Дар шаҳри Турсунзода 70 кг маводи нашъаовар мусодира карда шуд

ДУШАНБЕ, 17.06.2025. /АМИТ «Ховар»/. Дар натиҷаи гузаронидани чорабиниҳои фаврӣ-ҷустуҷӯии кормандони шуъбаи Кумитаи давлатии амнияти миллии Ҷумҳурии Тоҷикистон дар шаҳри Турсунзода як ҳолати қочоқ ва муомилоти ғайриқонунии маводи нашъаовар ошкор ва пешгирӣ гардид. 

Зимни чорабинӣ бо гумони даст доштан дар муомилоти ғайриқонунии маводи мухаддир шаҳрвандон Эшмуродов Шоимардон Наркузиевич, соли таваллудаш 1975, зода ва истиқоматкунандаи деҳаи Шулуми Ҷамоати деҳоти Навободи шаҳри Турсунзода, оиладор, соҳиби 9 фарзанд, Бойқулов Одилҷон Абдураҳмонович, соли таваллудаш 1986, зода ва истиқоматкунандаи деҳаи Нурободи Ҷамоати деҳоти Ҷӯра Раҳмони шаҳри Турсунзода ва Худойбердиев Ҷуманазар Маҳмадраҳимович, соли таваллудаш 1971, зода ва истиқоматкунандаи деҳаи Ширинчашмаи Ҷамоати деҳоти 10-солагии Истиқлолияти шаҳри Турсунзода боздошт гардиданд.

Ҳамзамон дар ҷойи ҳодиса дар ҳудуди заминҳои корами деҳаи Ширинчашмаи Ҷамоати деҳоти 10-солагии Истиқлолияти шаҳри Турсунзода аз махфигоҳ се адад борхалтаи полиэтиленӣ бо маводи нашъовар дар ҳаҷми махсусан калон ба миқдори 70 кг дарёфт ва мусодира карда шуд.

Дар рафти чорабиниҳои фаврӣ-тафтишотӣ муайян гардид, ки Эшмуродов Шоимардон Нарқузиевич гурӯҳи муташаккили ҷиноятии нашъаҷаллобро таъсис дода, бо истифода аз имкониятҳои ҳаммаслакони ҷиноятии худ Бойқулов Одилҷон Абдураҳмонович ва Худойбердиев Ҷуманазар Маҳмадраҳимович мунтазам хатти сарҳади давлатиро ғайриғонунӣ убур намуда, маводи мухадирро ба таври қочоқ ба ҳудуди Ҷумҳурии Узбекистон интиқол медодааст.

Аз рӯйи нишондоди боздоштшудагон муайян карда шуд, ки Шоимардон Эшмуродов дар асоси маслиҳати пешакӣ бо ҳаммаслакони ҷиноятии худ Ҷуманазар Худойбердиев ва Одилҷон Бойқулов маводи мухаддири мусодирашударо дар махфигоҳ, воқеъ дар ҳудуди заминҳои ғаллазори деҳаи Ширинчашма пинҳон карда, мақсад доштаанд бо истифода аз торикии шаб тавассути минтақаи осебпазири сарҳади давлатӣ онро ба кишвари ҳамсоя интиқол диҳанд.

Бояд тазаккур дод, ки мушкилоти муомилоти ғайриқонунии маводи нашъаовар ҳамчун яке аз хатарҳои ҷиддӣ ба генофонди миллӣ дар асри XXI боқӣ монда, он ба вазъияти сиёсии давлатҳо таҳдид менамояд. Миллионҳо нафар бо сабаби истеъмол намудани маводи мухаддир азият мекашанд. Илми тиб собит намудааст, ки маводи нашъаовар ба саломати инсонҳо таъсири манфӣ расонида, онҳоро ба бемории гуногун мубтало месозад.

Танҳо бо роҳи баланд бардоштани сатҳи маърифатнокии тиббию ҳуқуқии аҳолӣ, гузаронидани корҳои тарбиявию фаҳмондадиҳӣ ва муборизаи дастаҷамъона паҳншавии маводи нашъовар дар ҷомеа пешгирӣ ва решакан мегардад. Ин мубориза талошҳои муштараки аҳолӣ, ҳушёриву зиракии сиёсӣ ва ҳамкории мутақобилан судмандро бо мақомоти ҳифзи ҳукуқи ҷумҳурӣ тақозо менамояд.

Маркази робитаҳои ҷамъиятии
Кумитаи давлатии амнияти миллии Ҷумҳурии Тоҷикистон