Сафири Тоҷикистон ба Президенти Малдив эътимоднома супорид

ДУШАНБЕ, 23.06.2025 /АМИТ «Ховар»/. 23 июн Сафири Фавқулода ва Мухтори  Ҷумҳурии Тоҷикистон дар Ҷумҳурии Малдив (қароргоҳ дар Деҳлии Нав) Луқмон Бобокалонзода эътимодномаи хешро ба Президенти Малдив Моҳамед Муиззу супорид.

Тавре ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд, зимни маросими супоридани эътимоднома сафир дуруду таманниёти неки Президенти Ҷумҳурии Тоҷикистон, Пешвои миллат муҳтарам Эмомалӣ Раҳмонро ба Президенти Малдив расонид.

Президенти Малдив ба муносибати оғози фаъолият Сафири Тоҷикистонро табрик гуфта, ба ӯ дар иҷрои вазифаҳои дипломатӣ комёбиҳо орзу намуда, ҷиҳати тақвияти ҳамкории мутақобилан судманди дуҷониба дар соҳаҳои сайёҳӣ, маорифу илм, тиҷорату сармоягузорӣ ва дигар  ибрози назар намуд.

Муносибатҳои дипломатӣ байни Ҷумҳурии Тоҷикистон ва Ҷумҳурии Малдив шашуми октябри 1993 барқарор шудааст.

АКС: Вазорати корҳои хориҷии Ҷумҳурии Тоҷикистон