35-СОЛАГИИ ИСТИҚЛОЛИ ДАВЛАТӢ. Дар Истаравшан беш аз 60 километр роҳ пурра мумфарш карда шуд

ДУШАНБЕ, 28.08.2025 /АМИТ «Ховар»/. Дар шаҳри Истаравшан ба пешвози ҷашни 35-солагии Истиқлоли давлатии Ҷумҳурии Тоҷикистон дар  се моҳи охир дар маҷмуъ беш аз 60 км роҳҳо пурра мумфарш гардида, аз таъмири асосӣ бароварда шуданд, иттилоъ медиҳад АМИТ «Ховар» бо истинод ба хадамоти матбуоти Раиси вилояти Суғд.

Дар раванди корҳои ободонию бунёдкорӣ, мумфаршкунии роҳҳои кӯчаю гузарҳои маркази шаҳр ва маҳаллаю деҳот бо дастгирии сокинону соҳибкорон, аз ҷумла маблағгузории шахсоне, ки нияти ҳаҷи такрорӣ доштанд, авҷи тоза касб намуд.

Аз ҷумла, дар ҳудуди деҳоти «Гули сурх» 19 км, «Пошкент» 8 км, «Қалъачаи калон» 5,5 км, «Сабристон» 3,75 км, «Зарҳалол» 3,3 км ва дар «Қалъаи баланд» 1,4 км роҳҳои дохилидеҳавӣ мумфарш карда шуданд.

Дар кӯчаю гузарҳои ҳудуди маркази шаҳр корҳои мумфаршкунии роҳҳо босуръат идома доранд. То имрӯз дар  маҳаллаи  «Ваҳдат» 4,7 км, «Зафар» 3,5 км, «Курушкада» 2,2 км, «Рустамбек» 2 км, «Навоӣ» 2 км, «Исмоили Сомонӣ» 1,6 км, «Уротеппа» 1,1 км, «Имоми Аъзам» 1 км ва «Навобод» 1 км роҳҳо мумфарш гардидаанд.

Мумфаршкунӣ  дар дигар роҳҳои  шаҳри Истаравшан  идома дошта, сокинони шаҳр бо истифода аз боду ҳавои мусоид ба ободонии роҳу пул  ва тозаю озода нигоҳ доштани муҳити зист таваҷҷуҳи бештар зоҳир менамоянд.

 АКС: Хадамоти матбуоти Раиси вилояти Суғд