Ба шаҳри Норак беш аз 39 ҳазор сайёҳи дохилию хориҷӣ ворид гардид

ДУШАНБЕ, 03.08.2025. /АМИТ «Ховар»/. Дар шаш моҳи соли 2025 маконҳои сайёҳӣ ва истироҳатии шаҳри Норакро 39 ҳазору 600 сайёҳи дохилию хориҷӣ тамошо карда, истироҳат намудаанд. Дар ин хусус 30 июл зимни нишасти матбуотии Мақомоти иҷроияи ҳокимияти давлатии шаҳри Норак ба хабарнигорон иттилоъ дода шуд.

Зимни нишаст иброз гардид, ки дар шаҳри Норак 3 меҳмонхона, 29 ёдгории таърихию фарҳангӣ, 46 мавзеъи сайёҳӣ, 220 истироҳатгоҳ, 5 тарабхона, 1 осорхона, 1 мағозаи фурӯши армуғонҳо, 5 зиёратгоҳ, 1 боғи фарҳангию фароғатӣ ва шумораи зиёди хонаҳои истироҳатӣ фаъолият менамоянд.

Шаҳри Норак беш аз ҳама бо обанбори бузург ва Неругоҳи барқи обии «Норак» шинохта шудааст. Ин обанбор на танҳо аҳамияти энергетикӣ дорад, балки манзараҳои афсонавии он — кӯҳҳо, обҳои софу зулол ва ҳавои тоза ин шаҳрро ба макони дӯстдоштаи сайёҳон табдил додаанд. Ҳамин аст, ки ҳамасола шумораи сайёҳон хусусан барои заврақронӣ, моҳидорӣ ва истироҳат дар соҳили обанбор зиёд мегардад.

Бояд гуфт, ки бо манзараҳои нотакрор, табиати зебо, имконияти фаровони истироҳатӣ ва фарҳанги ғанӣ шаҳри Норак метавонад ба яке аз маконҳои равшани харитаи сайёҳии Тоҷикистон табдил ёбад.

АКС: АМИТ «Ховар»