Бахшида ба 32-солагии Қувваҳои ҳарбӣ-ҳавоӣ ва мудофиаи зиддиҳавоӣ ҳамоиш доир шуд

ДУШАНБЕ, 19.08.2025. /АМИТ «Ховар»/. Бахшида ба 32-солагии таъсиси Қувваҳои ҳарбӣ-ҳавоӣ ва мудофиаи зиддиҳавоии Қувваҳои Мусаллаҳи Ҷумҳурии Тоҷикистон дар Раёсати ин навъи қӯшуни Артиши миллӣ бо иштироки масъулини Ситоди генералии Қувваҳои Мусаллаҳ, роҳбарияти Мақомоти иҷроияи ҳокимияти давлатии ноҳияи Рӯдакӣ, афсарону сарбозон ва собиқадорони соҳа ҳамоиши тантанавӣ баргузор гардид. Дар ин хусус ба АМИТ «Ховар» аз маркази матбуот ва иттилооти Вазорати мудофиаи Ҷумҳурии Тоҷикистон хабар доданд.

Дар ҳамоиш иброз гардид, ки Қувваҳои ҳарбӣ-ҳавоӣ яке аз ҷузъҳои калидии қудрати дифоии давлат маҳсуб шуда, таъмини амнияти фазоии мамлакат, ҳифзи марзу буми ватан ва осоиши шаҳрвандонро таъмин менамоянд. Давоми даврони соҳибистиқлолӣ бо роҳбарии хирадмандонаи Сарфармондеҳи Олии Қувваҳои Мусаллаҳи Ҷумҳурии Тоҷикистон, генерали артиш муҳтарам Эмомалӣ Раҳмон ин сохтори низомӣ рушду такомул ёфта, ба қувваи боэътимоди муҳофизати давлат табдил ёфт.

Қувваҳои ҳарбӣ-ҳавоӣ ва мудофиаи зиддиҳавоии Қувваҳои Мусаллаҳи Ҷумҳурии Тоҷикистон кафолати осоишу оромии мардуми Тоҷикистон буда, рамзи қудрат, истиқлол ва таъмини амният дар фазои мамлакат мебошанд. Ин қувваҳо бо шарофати сиёсати сулҳпарваронаи Пешвои миллат муҳтарам Эмомалӣ Раҳмон пайваста рушд карда, таҷҳизот ва неруи инсонии он тадриҷан мукаммал мегардад.

Рӯзи касбии ҳавонавардони низомии тоҷик барои афсарону сарбозон рамзи ифтихор аз Ватан, садоқат ба Парчами давлатӣ ва қувваи ягонаи миллӣ ба ҳисоб меравад. Дар воқеъ, таҷлили ин сана на танҳо ифтихори ҳарбӣ, балки рамзи сулҳу амнияти пойдори Тоҷикистони соҳибистиқлол аст.

Дар ҷамъомади тантанавӣ ба як зумра афсарону сарбозон медалу Ифтихорнома ва туҳфаҳои хотиравӣ тақдим карда шуданд.

АКС: Маркази матбуот ва иттилооти Вазорати мудофиаи Ҷумҳурии Тоҷикистон