Дар 77 муассисаи таълимии Истаравшан беш аз 60 ҳазор хонанда ба таҳсил фаро гирифта шуд

СУҒД, 07.08.2025 /АМИТ «Ховар»/. Дар шаҳри Истаравшан 77 муассисаи таълимӣ фаъолият дорад. Дар онҳо ба ҳолати 1 июли соли 2025 60 ҳазору 769 нафар хонандагон ба таҳсил фаро гирифта шудаанд, ки 29 720 нафарашонро духтарон ташкил медиҳанд. Дар ин хусус зимни нишасти матбуотӣ Раиси шаҳри Истаравшан Адҳам Маъмурзода ба рӯзноманигорон маълумот дод.

Иттилоъ дода шуд, ки шумораи умумии омӯзгорон 3474 нафар буда, 2103 нафарашонро занону духтарон ташкил медиҳанд. Дар 17 муассисаи томактабӣ 2464 кӯдак ба таълиму тарбия фаро гирифта шуда, дар назди 60 муассисаи таълимии шаҳр 1981 нафар кӯдакони 5-6- сола ба маркази инкишофи кӯдак ҷалб карда шудаанд.

Дар нишасти матбуотӣ иброз гардид, ки аз 3302 хатмкунандаи муассисаҳои таълимии шаҳр 2493 нафарашон тавассути Маркази миллии тестии назди Президенти Ҷумҳурии Тоҷикистон ба муассисаҳои олии мамлакат ҳуҷҷат супориданд. Аз ин шумора 75,5 фоизи онҳо имкони дохил шудан ба муассисаҳои олӣ ва касбиро пайдо намуданд.

АКС: АМИТ «Ховар»