«МАДАНИЯТИ ШАҲРДОРӢ». Дар Хатлон бо мақсади таҳким бахшидани ҳамкорӣ бо аҳолӣ амалиёт гузаронида шуд

ДУШАНБЕ, 23.08.2025. /АМИТ «Ховар»/. Дар Раёсати Вазорати корҳои дохилии Ҷумҳурии Тоҷикистон дар вилояти Хатлон ҷаласа оид ба натиҷагирии фаъолияти гурӯҳҳои корӣ дар доираи амалиёти пешгирикунандаи «Маданияти шаҳрдорӣ» баргузор гардид. Амалиёти мазкур ба баланд бардоштани маърифати ҳуқуқии аҳолӣ, пешбурди корҳои фаҳмондадиҳӣ бо усули «хона ба хона», пешгирии ифротгароӣ ва тозаю озода нигоҳ доштани кӯчаю маҳаллаҳо равона гардидааст. Дар ин хусус АМИТ «Ховар» бо истинод ба ин раёсат хабар медиҳад.

Дар ҷаласа гуфта шуд, ки дар доираи амалиёти профилактикии «Маданияти шаҳрдорӣ» барои таҳким бахшидани ҳамкорӣ бо аҳолӣ дар самти баланд бардоштани маърифати ҳуқуқии қишрҳои гуногуни ҷомеа, тарғиби одоби шаҳрнишинӣ, вусъат додани ободонию созандагӣ, таҳкими худшиносию худогоҳии насли наврас, пешгирии ҷинояткорӣ ва ҳамроҳшавии ҷавонон ба ҳизбу ҳаракатҳои террористию экстремистӣ, аз байн бурдани амалҳои халалдоркунандаи тартиботу оромии ҷомеа, ҳифзи арзишҳои миллӣ ва аз байн бурдани тамоюли хурофотпарастию бегонапарастӣ дар ҷомеа аз ҷониби гурӯҳҳои корӣ чорабиниҳои маърифатӣ-ҳуқуқӣ ва фаҳмондадиҳӣ гузаронида шуданд, ки натиҷаҳои дилхоҳ доданд.

Сардори Раёсати Вазорати корҳои дохилии Ҷумҳурии Тоҷикистон дар вилояти Хатлон Шариф Назарзода масъулини гурӯҳҳоро вазифадор намуд, ки зимни пешбурди корҳои фаҳмондадиҳӣ дар маҳалҳо зарурати таъмини талаботи қонунҳои миллӣ, аз ҷумла Қонуни Ҷумҳурии Тоҷикистон «Дар бораи масъулият барои таълиму тарбияи кӯдак», «Дар бораи танзими ҷашну маросим», ҳамчунин сарфакорона истифода бурдани неруи барқро ба аҳолӣ фаҳмонанд.

АКС: Раёсати Вазорати корҳои дохилии Ҷумҳурии Тоҷикистон дар вилояти Хатлон