Бахшида ба 34-солагии Истиқлоли давлатӣ ҳамоиши аъзои Ҳизби Халқии Демократии Тоҷикистон доир шуд

ДУШАНБЕ, 04.09.2025. /АМИТ «Ховар»/. 3 сентябр дар шаҳри Душанбе ба муносибати 34-солагии Истиқлоли давлатии Ҷумҳурии Тоҷикистон таҳти унвони «Таҳкими истиқлолият ва рушди давлатдории миллӣ — ҳадафи Ҳизби Халқии Демократии Тоҷикистон» ҳамоиш баргузор гардид. Дар ин хусус АМИТ «Ховар» бо истинод ба Кумитаи Иҷроияи Ҳизби Халқии Демократии Тоҷикистон иттилоъ медиҳад.

Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Абдулло Раҳмонзода иброз дошт, ки ба фишору таҳдид ва таъсири абарқудратҳо танҳо миллате истодагарӣ карда метавонад, ки Сарвари боору номус, сиёсатмадори зираку хирадманд ва нотарсу далер дошта бошад. Чунин роҳбару сарвар барои миллати тоҷик- Президенти Тоҷикистон, Пешвои муаззами миллат, Раиси Ҳизби Халқии Демократии Тоҷикистон муҳтарам Эмомалӣ Раҳмон мебошанд, ки тамоми ҳастиашонро ба истиқлоли мамлакат, Ваҳдати миллӣ ва шукуфоии миллат бахшида, миллату давлатро аз вартаи нестӣ раҳоӣ бахшиданд.

Муовини якуми Раиси Ҳизби Халқии Демократии Тоҷикистон Маликшо Неъматзода гуфт, ки аз замонҳои қадим тоҷикон бо хиради оламсоз ва таъриху фарҳанги нодир, бо ҳиммати ҷонфидоӣ ва ақлу шуури худ пайваста дар масири таъриху саҳнаҳои ҷаҳонӣ номи худро нигошта, ҳамчун миллати соҳибтамаддун, соҳибхирад, озодидӯст ва боадолат боқӣ мондаанд.

Дар ҳамоиш собиқадорони ҳизбӣ ва фаъолон бо медали «30- солагии Ҳизби Халқии Демократии Тоҷикистон» ва сипосномаҳо сарфароз гардонида шуданд.

АКС: Кумитаи иҷроияи марказии Ҳизби Халқии Демократии Тоҷикистон