Дар рӯзи охирини Ҷоми ҷаҳон оид ба самбо варзишгарони тоҷик соҳиби 6 медал шуданд

ДУШАНБЕ, 22.09.2025. /АМИТ «Ховар»/. Дар рӯзи охирини нахустин Ҷоми ҷаҳон оид ба самбо, ки дар шаҳри Душанбе бо иштироки беш аз 220 варзишгар аз 12 давлат баргузор гардид, паҳлавонони Тоҷикистон аз намуди самбои размӣ байни мардон соҳиби шаш медал, аз ҷумла ду  медали тилло, ду  нуқра ва ду биринҷӣ гардиданд. Дар ин хусус ба АМИТ «Ховар» аз Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд.

Медалҳои тиллоро Холид Талибзода ва Фариддун Одилов, медалҳои нуқраро Мустафо Алибеков ва Ҳисайн Ҷамахонӣ ва медалҳои биринҷиро Исфандиёр Холов ва Саймуҳаммад Исматзода ба даст оварданд.

Мусобиқа 20-21 сентябр баргузор шуда, варзишгарон дар ду бахш — самбои варзишӣ ва самбои размӣ дар 14 вазн байни мардону занон рақобат намуданд.

Ёдовар мешавем, ки маросими ифтитоҳи мусобиқа 20 сентябр дар маҷмааи варзишии Донишгоҳи миллии Тоҷикистон ифтитоҳ гардид.

Зимни ифтитоҳи он Раиси Кумитаи кор бо ҷавонон ва варзиши мамлакат Зулфиқор Гулаҳмадзода изҳор дошт, ки баргузории ин мусобиқаи байналмилалӣ дар Тоҷикистон далели муҳими рушди самбо дар ҷумҳурӣ буда, дар муаррифии арзишҳои миллӣ ва таҳкими дӯстии байналмилалӣ саҳми арзанда хоҳад дошт.

Ғолибони рӯзи охирини Ҷоми ҷаҳон оид ба самбо дар шаҳри Душанбе

Бояд гуфт, ки дар маҷмуъ варзишгарони Тоҷикистон дар мусобиқа байни мардон соҳиби 9 медал, аз ҷумла 2 тилло, 3 нуқра ва 4 биринҷӣ гардиданд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон