Имконияти сармоягузории ширкати «Sinosure»-и Чин ба соҳаи энергетикаи Тоҷикистон баррасӣ карда шуд

ДУШАНБЕ, 02.09.2025 /АМИТ «Ховар»/. Ба роҳ мондани ҳамкорӣ ва имконияти сармоягузории ширкати «Sinosure»-и Чин ба соҳаи энергетикаи Тоҷикистон дар мулоқоти Вазири энергетика ва захираҳои оби Ҷумҳурии Тоҷикистон Далер Ҷумъа бо роҳбарияти ин ширкат дар Душанбе баррасӣ гардид, иттилоъ медиҳад АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон.

Ҷонибҳо доир ба рушди манбаъҳои барқароршавандаи энергия табодули назар карданд. Дар идома имконият ва афзалияти мамлакат дар самти бунёд ва татбиқи лоиҳаҳои неругоҳҳои барқи офтобӣ ва бодӣ муаррифӣ гардид.

Ҷумҳурии Тоҷикистон дорои захираҳои фаровони табиӣ буда, барои рушди неруи офтобӣ ва бодӣ шароити мусоиди табиӣ ва иқлимӣ дорад.

Роҳбарияти ширкати «Sinosure» барои омӯзиши амиқи имконияти сармоягузорӣ ва татбиқи лоиҳаҳои муштарак бо Ҷумҳурии Тоҷикистон изҳори омодагӣ намуд.

АКС: Вазорати энергетика ва захираҳои оби Ҷумҳурии Тоҷикистон