«НАҚШИ ВАҲДАТИ МИЛЛӢ ДАР ТАҲКИМИ ДАВЛАТДОРИИ МИЛЛӢ». Ба шарафи Рӯзи Истиқлолияти давлатӣ ҳамоиш доир шуд

ДУШАНБЕ, 04.09.2025. /АМИТ «Ховар»/. Имрӯз ба истиқболи 34-солагии Истиқлоли давлатӣ дар толори Мақомоти иҷроияи ҳокимияти давлатии ноҳияи Синои шаҳри Душанбе ҳамоиши илмӣ-амалӣ таҳти унвони «Нақши ваҳдати миллӣ дар таҳкими Истиқлоли давлатӣ» баргузор гардид.

Ҳамоиш бо сухани ифтитоҳии Раиси Кумитаи иҷроияи Ҳаракати ваҳдати миллӣ ва эҳёи Тоҷикистон  Рудобаи Мукаррам оғоз гардид. Доир ба нақши Ваҳдати миллӣ дар таҳкиму густариши пояҳои Истиқлоли давлатӣ ва сиёсати хирадмандонаи Пешвои миллат муҳтарам Эмомалӣ Раҳмон гуфта шуд, ки маҳз бо таъмини ваҳдати миллӣ, ки бо талошу заҳмати фарзанди фарзонаи миллат, Президенти кишвар муҳтарам Эмомалӣ Раҳмон ба даст омадааст, Истиқлоли давлатӣ тақвият ёфт. Таъкид гардид, ки Ваҳдату Истиқлол — ду арзиши олии ҳастии миллат бояд ҳамеша ҳифз ва гиромӣ дошта шавад ва ба наслҳои оянда ба саломат мерос монад.

Дар идомаи ҳамоиш дар мавзуҳои «Ваҳдати миллӣ — омили муттаҳидии миллат», «Ваҳдати миллӣ — кафили пешрафти ҷомеа», «Нақши ваҳдати миллӣ дар таҳкими Истиқлоли давлатии Тоҷикистон», «Истиқлол — заминаи худшиносӣ ва рушди давлатдории миллати тоҷик»ва «Ваҳдати миллӣ — воситаи муҳимми ба даст овардани Истиқлоли давлатӣ ва рушди он» маърузаҳо карда шуданд. Ҳамчунин доир ба масъалаҳои таҳкими ваҳдати миллӣ ва боло бурдани маърифати ҳуқуқиву сиёсии ҷавонон андешаҳои иштирокчиёни ҳамоиш шунида шуда, таъкид гардид, ки дар шароити ҷаҳони муосир ҳифзи Ваҳдати миллӣ ва таҳкими Истиқлоли давлатӣ вазифаи муқаддас ва масъулияти баланди ҳар як шаҳрванди кишвар мебошад.

АКС: Раёсати кор бо занон ва оилаи Мақомоти иҷроияи ҳокимияти давлатии шаҳри Душанбе