Оид ба омӯзиши таърих ва тамаддуни халқи тоҷик дар замони соҳибистиқлолӣ конфронси илмӣ баргузор гардид

ДУШАНБЕ, 10.09.2025. /АМИТ «Ховар»/. Бо ташаббуси Агентии ҳифзи мероси таърихию фарҳангии назди Ҳукумати Ҷумҳурии Тоҷикистон бахшида ба Истиқлоли давлатии Ҷумҳурии Тоҷикистон дар заминаи Муассисаи давлатии пойгоҳи бостоншиносии Саразм-Панҷакент ва Осорхонаи 5500-солагии Саразм таҳти унвони «Омӯзиши таърих ва тамаддуни халқи тоҷик дар замони соҳибистиқлолии мамлакат» конфронси илмӣ баргузор гардид, хабар доданд ба АМИТ «Ховар» аз ин агентӣ.

Дар конфронс олимони Тоҷикистон, Фаронса, Исроил, Италия ва Белгия иштирок намуданд.

Иброз гардид, ки дар солҳои соҳибистиқлолӣ бо дастгириҳои Пешвои миллат муҳтарам Эмомалӣ Раҳмон соҳаи ҳифзи ёдгориҳои таърихӣ ба комёбиҳои зиёд ноил гардид. Барои ҳифз ва муаррифии ёдгориҳои таърихию фарҳангӣ дар қаламрави ҷумҳурӣ осорхонаҳои нави ба фаъолияти осорхонавӣ ҷавобгӯ бунёд гардиданд.

Иштирокчиёни конфронс масъалаи ҳифз ва омӯзиши мероси таърихию фарҳангии солҳои соҳибистиқлолии Тоҷикистонро мавриди баррасӣ ва мубодилаи афкор қарор доданд.

Аз ҷумла, таъкид гардид, ки муҳофизат ва гиромӣ доштани мероси таърихию фарҳангӣ ва ба наслҳои оянда расонидани онҳо вазифаи муҳими ҳар фарди солимфикри ҷомеа аст, зеро хурдтарин осори гузашта метавонад қимати баланди илмию таърихӣ дошта бошад. Сарватҳои таърихию фарҳангии халқи тоҷик пайвандгари ҳаёти моддӣ ва маънавии ниёгони мо буда, дар маҷмуъ онҳо саҳифаҳои таърихи чандҳазорсолаи миллати куҳанбунёдро бо ҳам васл менамоянд.

АКС: Агентии ҳифзи мероси таърихию фарҳангии назди Ҳукумати Ҷумҳурии Тоҷикистон