Тоҷикистон ва Қирғизистон ҳамкориро дар соҳаи рақамикунонӣ тақвият медиҳанд

ДУШАНБЕ, 01.09.2025 /АМИТ«Ховар»/. Тоҷикистон ва Қирғизистон ҳамкориро дар соҳаи рақамикунонӣ тақвият медиҳанд. Дар доираи сафари ҳайати Ҷумҳурии Тоҷикистон таҳти роҳбарии муовини якуми Сарвазири Ҷумҳурии Тоҷикистон Ҳоким Холиқзода ба Ҷумҳурии Қирғизистон тавсеаи ҳамкории ду давлат дар соҳаи рақамикунонӣ баррасӣ гардид. Дар ин хусус АМИТ «Ховар» бо истинод ба Агентии инноватсия ва технологияҳои рақамии назди Президенти Ҷумҳурии Тоҷикистон иттилоъ медиҳад.

Табодули таҷриба дар соҳаи рақамикунонӣ ва рушди ҳамкории дуҷонибаи иқтисодӣ аз ҳадафҳои асосии сафари ҳайати Тоҷикистон ба Қирғизистон буд. Ҳайати Тоҷикистон дар Муассисаи давлатии «Кызмат» бо якчанд лоиҳаи рақамӣ, аз ҷумла низоми «Шаҳри амн», гардиши электронии ҳуҷҷатҳо «Инфодокс», ҳалли абрӣ (cloud solutions), G-Cloud ва Кызмат-ID, инчунин фаъолияти Ҷамъияти саҳомии кушодаи «Учкун» ва «Технопарк» шинос гардид.

Ҷонибҳо барои идомаи табодули таҷриба ва густариши ҳамкорӣ дар самтҳои рақамикунонӣ, маъмурияти андоз, идоракунии молияи давлатӣ ва рушди сайёҳӣ изҳори омодагӣ намуданд.

Соҳаи инноватсия ва технологияҳои рақамиро дар ҳайат директори Агентии инноватсия ва технологияҳои рақамии назди Президенти Ҷумҳурии Тоҷикистон Хуршед Мирзо муаррифӣ намуд.

АКС: Агентии инноватсия ва технологияҳои рақамии назди Президенти Ҷумҳурии Тоҷикистон