35-СОЛАГИИ ИСТИҚЛОЛИ ДАВЛАТӢ. Дар ноҳияи Мастчоҳ сохтмони якчанд иншооти ҷашнӣ идома дорад

ДУШАНБЕ, 26.10.2025. /АМИТ «Ховар»/. Дар ноҳияи Мастчоҳ  бахшида ба 35-солагии Истиқлоли давлатӣ сохтмони якчанд иншооти ҷашнӣ идома дорад, хабар медиҳад АМИТ «Ховар» бо истинод ба мақомоти иҷроияи ҳокимияти давлатии ноҳия.

Дар Ҷамоати шаҳраки Суғдиён сохтмони кӯдакистони нав барои 240 нафар идома дорад. Дар ин ҷамоат зиёда аз 4 ҳазор аҳолӣ зиндагӣ дошта, аз шаҳракҳои навбунёд ба ҳисоб меравад. Аз ин рӯ, бунёди муассисаҳои таълимӣ, кӯдакистон ва иншооти иҷтимоӣ дар маркази таваҷҷуҳи роҳбарияти он қарор дорад. Бо мавриди истифода қарор гирифтани кӯдакистон кӯдакони шаҳрак дар шароити мусоид ба таҳсилоти томактабӣ фаро гирифта мешаванд.

Дар Ҷамоати деҳоти Палдорак сохтмони бинои нави Муассисаи таҳсилоти миёнаи умумии №40 идома дорад. Иншоот дорои 8 синфхона буда, бо саҳми сокинону соҳибкорон бунёд мешавад.

Дар ноҳияи Мастчоҳ бинои нави беморхона сохта, ба истифода дода мешавад. Иншоот бо маблағгузории Мақомоти иҷроияи ҳокимияти давлатии вилояти Суғд бунёд гардида, дар таҳхонаи он ташхисгоҳҳо ва ҳуҷраҳои ёрирасон ҷойгир мегарданд. Бинои нав барои 285 кат пешбинӣ гардида, дорои шароити замонавӣ хоҳад шуд.

АКС: Мақомоти иҷроияи ҳокимияти давлатии ноҳияи Мастчоҳ