Ба ифтихори Рӯзи забони давлатӣ дар Академияи идоракунии давлатӣ конференсияи ҷумҳуриявии илмию назариявӣ доир шуд

ДУШАНБЕ, 04.10.2025 /АМИТ «Ховар»/. 3 октябр дар Академияи идоракунии давлатии назди Президенти Ҷумҳурии Тоҷикистон конференсияи ҷумҳуриявии илмию назариявӣ дар мавзуи “Забони тоҷикӣ ва марҳилаҳои таърихии он: вазъ ва мушкилот” баргузор гардид.

Тавре ба АМИТ «Ховар» аз Академияи идоракунии давлатӣ хабар доданд, ин ҳамоиши илмӣ ба ифтихори Рӯзи забони давлатӣ доир гардида, ҳадафи он бознигарӣ ва баррасии ҷанбаҳои гуногуни таърихӣ, сиёсӣ, иҷтимоӣ ва фарҳангии забони тоҷикӣ, таҳкими мақоми он дар ҷомеа ва пешниҳоди роҳҳои илмӣ-амалии ҳалли мушкилоти мавҷуда буд. Забони тоҷикӣ дар ин ҳамоиш ҳамчун яке аз рукнҳои худшиносии миллӣ, пояи давлатдорӣ ва арзиши бунёдии истиқлолияти давлатӣ муаррифӣ шуд.

Дар кори конференсия намояндагони идораҳои давлатӣ, муассисаҳои илмӣ-таҳқиқотӣ ва таълимӣ, муҳаққиқон, донишмандон, омӯзгорон ишитрок намуданд.

Дар ҷараёни ҳамоиш аҳаммияти илмӣ ва амалии конфронс дар заминаи сиёсати давлатӣ дар соҳаи забон шарҳ дода шуд.

Сипас муҳаққиқони соҳа  оид ба  андешаҳои Пешвои миллат доир ба масъалаҳои мубрами забони тоҷикӣ, забоншиносии матн ва афкори забоншиносии тоҷик, марҳилабандии таърихи забони тоҷикӣ ва мушкилоти мубрами он андешаронӣ намуданд.

Дар фарҷоми ҳамоиш таъкид гардид, ки забони тоҷикӣ имрӯз на танҳо василаи муошират, балки рамзи худшиносӣ, ваҳдат ва истиқлолияти миллӣ мебошад. Натиҷаҳои баррасишуда ва андешаҳои олимону муҳаққиқон дар шакли маҷмуаи илмӣ ба нашр расида, ҳамчун манбаи боэътимод ва арзишманд барои муҳаққиқон, донишҷӯён ва дӯстдорони забони ноби тоҷикӣ хизмат хоҳад кард.

АКС: Академияи идоракунии давлатии назди Президенти Ҷумҳурии Тоҷикистон