Дастаи мунтахаби наврасони Тоҷикистон (U-17) дар Амороти Муттаҳидаи Араб бозиҳои дӯстона анҷом медиҳад

ДУШАНБЕ, 20.10.2025 /АМИТ «Ховар»/. Дастаи мунтахаби наврасони Тоҷикистон (U-17) оид ба футбол дар доираи омодагӣ ба марҳилаи ниҳоии Ҷоми ҷаҳон-2025 таҳти роҳбарии Марко Раҷини дар ҷамъомади таълимию тамринӣ дар Амороти Муттаҳидаи Араб силсилабозиҳои дӯстона анҷом медиҳад.

Тавре ба АМИТ «Ховар» аз Федератсияи футболи Тоҷикистон хабар доданд, дар ҷамъомади таълимию тамринӣ дар Дубай дастаи мунтахаби наврасони Тоҷикистон бо дастаҳои Замбия (22 октябр), Каледонияи Нав (24 октябр) ва Мексика (30 октябр) бозӣ мекунад. Ҳама рақибони дастаи Тоҷикистон дар Ҷоми ҷаҳон-2025 иштирок менамоянд.

Дар Ҷоми ҷаҳон-2025 дар Қатар дастаи мунтахаби наврасони Тоҷикистон (U-17) дар гурӯҳи «I» бо тимҳои Чехия (5 ноябр), ИМА (8 ноябр) ва Буркина-Фасо (11 ноябр) рақобат мекунад.

АКС: Федератсияи футболи Тоҷикистон