«Динамо»-и Вазорати корҳои дохилии Тоҷикистон дар мусобиқаи байналмилалии футзал сазовори ҷойи сеюм гардид

ДУШАНБЕ, 05.10.2025 /АМИТ «Ховар»/. Дар варзишгоҳи «Динамо»-и шаҳри Волгогради Федератсияи Русия маросими ҷоизасупории анҷоми марҳилаи V «Бозии байналмилалии футзали сохторҳои қудратӣ» баргузор гардид, ки дар он Шурои ҷумҳуриявии «Динамо»-и Вазорати корҳои дохилии Ҷумҳурии Тоҷикистон сазовори ҷойи сеюм гардид. Дар ин хусус АМИТ «Ховар» бо истинод ба Вазорати корҳои дохилии Ҷумҳурии Тоҷикистон хабар медиҳад.

Дар мусобиқа 23 дастаи намояндагони сохторҳои қудратӣ аз тамоми минтақаҳои Русия, инчунин дастаҳои мунтахаби Тоҷикистон, Қирғизистон, Беларус ва Сербия иштирок намуданд.

Дар «Бозии байналмилалии футзали сохторҳои қудратӣ» 230 варзишгар иштирок намуд. Мусобиқа байни мардони то 40-сола ва аз 40-сола боло гузаронида шуд.

Шурои ҷумҳуриявии «Динамо»-и Вазорати корҳои дохилии Ҷумҳурии Тоҷикистон дар гурӯҳи мусобиқаи аз 40 сола боло сазовори ҷойи сеюм гардид.

Ғолибон ва беҳтаринҳо бо ҷоиза ва Ифтихорнома қадрдонӣ гардиданд.

АКС: Вазорати корҳои дохилии Ҷумҳурии Тоҷикистон