Таҳти унвони «Илм ва таҳсилот баҳри солимии миллат» конференсияи илмӣ-амалӣ баргузор гардид

ДУШАНБЕ, 31.10.2025. /АМИТ «Ховар»/. Имрӯз дар шаҳри Душанбе конференсияи 73-юми солонаи илмӣ-амалӣ таҳти унвони «Илм ва таҳсилот баҳри солимии миллат» баргузор шуд. Дар ин хусус ба АМИТ «Ховар» аз Донишгоҳи давлатии тиббии Тоҷикистон ба номи Абуалӣ ибни Сино иттилоъ доданд.

Дар кори конференсия олимону табибони ватаниву хориҷӣ доир ба бемориҳои неврологӣ, санги гурда, бемориҳои дарунӣ, эндокринология, бемориҳои пӯст, сироятӣ, гӯш, гулӯ, бинӣ, чашм ва дигар масъалаҳои соҳаи тиб мубодилаи афкор намуданд.

Ҳадафи баргузории конференсияи илмӣ ба вуҷуд овардани шароити мусоиди баҳсу мунозираҳои созандаи илмӣ бо олимону табибон мебошад. Инчунин дар доираи ин ҳамоиш масъалаи, робитаҳои дӯстӣ ва ҳамкории мутақобилан судманд бо пешрафтатарин муассисаҳои таълимию табобатии хориҷи дуру наздик баррасӣ мегарданд.

Гуфта шуд, ки фаъолияти илмиву навоварӣ яке аз меъёрҳои асосии муайян намудани дараҷаи рушду инкишофи муассисаҳои олии касбӣ маҳсуб меёбад. Аз ин рӯ, донишгоҳ барои баланд бардоштани сатҳу сифати корҳои илмӣ ва дар амалияи клиникӣ татбиқ намудани дастовардҳои муҳимтарини олимон ҳамеша дар маркази диққати роҳбарияти донишгоҳ қарор дорад. Ин аст, ки таваҷҷуҳи устодони таълимгоҳ сол аз сол ба таҳқиқи самтҳои гуногуни илми тиб бештар гашта, шумораи тадқиқочиёну пажӯҳишгарон аз ҳисоби ҷавонони лаёқатманд торафт меафзояд.

Ҳамчунин дар ҷараёни конференсия масъалаҳо оид ба технологияи муосиру инноватсионӣ дар тибби назариявӣ ва клиникӣ ва татбиқи дастовардҳои навини илмӣ дар раванди таҳсилоти олии тиббӣ баррасӣ гардиданд.

АКС: Донишгоҳи давлатии тиббии Тоҷикистон ба номи Абуалӣ ибни Сино