35-СОЛАГИИ ИСТИҚЛОЛИ ДАВЛАТӢ. 4 километр роҳи деҳаи Меҳргони Шаҳринав мумфарш карда шуд

ШАҲРИНАВ, 30.11.2025 /АМИТ «Ховар»/.  Ба шарафи ҷашни 35-солагии Истиқлоли давлатии Ҷумҳурии Тоҷикистон 4 километр роҳҳои дохилии деҳаи Меҳргони Ҷамоати деҳоти Сабои ноҳияи Шаҳринав бо дастгирии Мақомоти иҷроияи ҳокимияти давлатии ноҳия ва саҳми сокинону соҳибкорон мумфарш  карда шуд. Дар ин хусус ба хабарнигори  минтақавии АМИТ «Ховар» Субҳониддини Маҳмуд аз  Мақомоти иҷроияи ҳокимияти давлатии ноҳияи Шаҳринав иттилоъ доданд.

Раиси ноҳияи Шаҳринав  Абдуқодир Вализода  зимни иштирок дар корҳои мумфаршкунии роҳи деҳаи Меҳргон иқдоми созандаи сокинону соҳибкорони деҳаро шоистаи таҳсин ва намунаи ибрат хонд.

Сокинони деҳаи Меҳргон сиёсати созандаю бунёдкоронаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмонро дастгирию ҷонибдорӣ намуда, бо азму иродаи қавӣ дар деҳа  се чоҳи амудӣ канданд. Ҳамзамон даҳҳо симчӯбҳои чӯбинро бар бетонӣ иваз ва кӯчаҳои деҳаро пурра чароғон намуданд. Чунин ташаббусҳои созанда дар дигар ҷамоатҳои ноҳияи Шаҳринав идома доранд.

АКС: Мақомоти иҷроияи ҳокимияти давлатии ноҳияи Шаҳринав