Дар ноҳияи Рашт кӯпруки мошингард ба истифода дода шуд

ДУШАНБЕ, 09.11.2025 /АМИТ «Ховар»/. Кӯпруки мошингузари болои дарёи Кафтархона, воқеъ дар ноҳияи Рашт баъди таҷдид мавриди истифода қарор дода шуд. Дарозии пул 20 метр ва паҳноиаш 4 метр буда, минбаъд нақлиёти боркашонӣ аз он бемонеа ҳаракат менамояд, иттилоъ медиҳад АМИТ «Ховар» бо истинод ба Мақомоти иҷроияи ҳокимияти давлатии ноҳияи Рашт.

Кӯпруки мошингузар дар масири роҳи мошингарди Рашт-Кафтархона ҷойгир буда, соли равон бар асари баланд шудани маҷрои дарё пурра хароб гардида буд.

Маъмурияти Ҷамъияти дорои масъулияташ маҳдуди «Камароб» бо истифода аз маблағҳои худӣ ин пули мошингузарро дар муҳлати кутоҳ аз нав бунёд намуда, мавриди истифода қарор доданд.

АКС: Мақомоти иҷроияи ҳокимияти давлатии ноҳияи Рашт