Дар Шуғнон бо мақсади пешгирӣ аз омилҳои номатлуб бо хонандагон, омӯзгорон ва падару модарон вохӯрӣ доир гардид

ДУШАНБЕ, 03.11.2025 /АМИТ «Ховар»/. Дар Муассисаи таҳсилоти миёнаи умумии №42-и Ҷамоати деҳоти Вери ноҳияи Шуғнон, Гурӯҳи кории мақомоти иҷроияи ҳокимияти давлатии ноҳия дар ҳамбастагӣ бо дигар сохторҳои дахлдор бо усули «мактаб ба мактаб» бо хонандагон, омӯзгорон ва падару модарон вохӯрӣ доир намуд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии ноҳияи Шуғнон хабар медиҳад.

Дар ҷамъомад гуфта шуд, ки фардои дурахшони Тоҷикистон маҳз аз сатҳи саводнокӣ ва маърифати баланди аҳли ҷомеа ва пешрафти илму техника вобаста мебошад. Аз ин рӯ, ҷалби ҷавонону наврасон ба илму дониш ва касбу ҳунар бояд дар маркази таваҷҷуҳи ҳамаи аҳли ҷомеа қарор дошта бошад.

«Ҷавонон бояд дар зиндагӣ роҳи дурустро интихоб кунанд, рафтору кирдорашонро ба манфиати худ, оила, давлат ва ҷомеа равона карда, бо истифода аз фазои сулҳу оромии мамлакат ва имконияти фароҳамовардаи давлат ба касбомӯзӣ ва аз худ намудани илму дониш машғул шаванд»,- таъкид гардид дар вохӯрӣ.

Намояндагони мақомоти давлатӣ ҳамчунин ба иштирокдорони ҳамоиш моҳияти қонунҳои Ҷумҳурии Тоҷикистон «Дар бораи масъулият барои таълиму тарбияи кӯдак», «Дар бораи маориф» ва «Дар бораи тарбияи ватандӯстии шаҳрвандон»-ро шарҳу тавзеҳ доданд.

Масъулин ҳамзамон оид ба пешгирии омилҳои номатлуб байни наврасону ҷавонон, ҷинояткорӣ, шомилшавӣ онҳо ба созмону гурӯҳҳои фаъолияташон дар кишвар манъшуда, ҷалби падару модар ба таълиму тарбияи фарзанд, ҳатмӣ будани таҳсил дар зинаи сеюми таҳсилот, коҳиш додани ҷудошавии оилаҳои ҷавон, омӯзонидани духтарон ба рӯзгордориву оиладорӣ, гиромӣ доштани фарҳанги либоспӯшии миллӣ ва саҳм гузоштан дар корҳои тозакориву ободонӣ изҳори андеша намуданд.

АКС: Мақомоти иҷроияи ҳокимияти давлатии ноҳияи Шуғнон