IRS: Дар шоҳроҳи Душанбе — Чаноқ баландии барф то 15 сантиметр мерасад

ДУШАНБЕ, 04.11.2025 /АМИТ «Ховар»/. Дар шоҳроҳи  Душанбе — Чаноқ бориши барф идома дошта, баландии он  дар баъзе минтақаҳо, аз ҷумла минтақаи наздик ба нақби Истиқлол то 15 сантиметр мерасад. Дар ин хусус ба АМИТ «Ховар» аз филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон хабар доданд.

Ба иттилои манбаъ,  дар робита ба ҳолати мазкур кормандони ширкат бетаъхир чораандешӣ намуда, роҳро аз барф тоза ва бо маводи зиддилағзиш коркард намуда истодаанд.

Филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон аз ронандагон хоҳиш намудааст,  ки қоидаҳои ҳаракат дар роҳро риоя намуда, ҷони худ ва дигаронро дар хатар нагузоранд.

Тавре қаблан хабар додем, тибқи иттилои Агентии обуҳавошиносии Тоҷикистон, аз 2 то 5 ноябр дар мамлакат ҳаво номусоид шуда, бориши борон ва барф пешгӯӣ мешавад. Сабаби якбора сард шудани ҳаво воридшавии анбӯҳи ҳавои сард дар ҷумҳурӣ мебошад.

Ронандагоне, ки дар чунин рӯзҳо азми сафар доранд, бояд:

— ҳолати техникии мошини худро ҷиддӣ аз назар гузаронанд, то дар роҳ ба мушкилӣ дучор нашаванд;

— иқтидори аккумуляторро санҷанд;

— чархҳои зимистона насб намоянд, ронандагони мошинҳои боркаши калон ҳатман занҷирҳои зидди яхбандӣ гиранд;

— ҳангоми ҳаракат дар роҳи Душанбе — Чанок нисбат ба мавсими гармо фосилаи бештар гиранд;

— агар мошин ба мавсими сармо омода нест, беҳтар аст муваққатан аз сафар худдорӣ намоянд;

— тавсияҳои кормандони IRS, Бозрасии давлатии автомобилӣ, Вазорати корҳои дохилии Ҷумҳурии Тоҷикистон, Кумитаи ҳолатҳои фавқулода ва мудофиаи гражданиро дар мавриди маҳдуд будани ҳаракати мошинҳо ҳангоми мавҷудияти эҳтимоли тармафароӣ, лағзиши кӯҳпора ва сангфароӣ бечуну чаро риоя намоянд.

Бо назардошти ин аз ронандагон хоҳиш мешавад, ки бе омодагие, ки фасли сармо тақозо дорад ва бо автомобилҳое, ки тири пешбар надоранд, ба роҳ набароянд, зеро дар баробари он ки худашон дучори мушкилӣ мегарданд, ҳамзамон ба ҳаракати дигар воситаҳои нақлиёт монеа эҷод менамоянд.

АКС: филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон