Оид ба ҳамкории Тоҷикистон ва Иттиҳоди Аврупо дар рушди энергетикаи устувор намоиши аксҳо доир шуд

ДУШАНБЕ, 16.11.2025 /АМИТ «Ховар»/. «Тоҷикистон-Иттиҳоди Аврупо: ҳамкорӣ дар рушди энергетикаи устувор» — таҳти чунин унвон дар Душанбе намоиши аксҳо баргузор гардид, иттилоъ медиҳад      АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон.

Дар маросими ифтитоҳи намоиши аксҳо  муовини Вазири энергетикаи мамлакат  Манучеҳр Сафарзода иброз намуд, ки «ин намоиши аксҳо аҳамияти махсус дорад. Имрӯз дар ҷумҳурӣ таваҷҷуҳи махсус ба ҷалби духтарон ва занон ба соҳаи энергетика зоҳир карда мешавад. Ин самти стратегӣ ва муҳим аст, зеро рушди энергетикаи устувор бе имконияти баробар барои ҳама ғайриимкон мебошад».

Дар Тоҷикистон тамоми шароити зарурӣ барои амалӣ шудани фаъолияти касбии занон дар соҳаи энергетика  муҳайё аст, аммо, мутаассифона, духтарон кам ба ин роҳ қадам мегузоранд. Дар намоиши аксҳо расму мусаввараҳои занону духтарони тоҷике, ки дар соҳаи энергетикаи мамлакат бо мардон паҳлу ба паҳлу фаъолият менамоянд, ба маърази тамошо гузошта шуданд. Ин далели далерию шуҷоатмандии  занону духтарони тоҷик мебошад.

АКС: Вазорати энергетика ва захираҳои оби Ҷумҳурии Тоҷикистон