«САДОҚАТ БА ПЕШВОИ МИЛЛАТ». Ба ифтихори Рӯзи Президенти Тоҷикистон дар Данғара иқдом баргузор шуд

ДУШАНБЕ, 14.11.2025 /АМИТ «Ховар»/. Ба ифтихори Рӯзи Президенти Тоҷикистон 12 ноябр аз ҷониби кормандон ва донишҷӯёни Донишкадаи байналмилалии Данғараи Донишгоҳи байналмилалии сайёҳӣ ва соҳибкории Тоҷикистон таҳти унвони «Садоқат ба Пешвои миллат» иқдоми ватандӯстона гузаронида шуд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии ноҳияи Данғара хабар медиҳад.

Гурӯҳҳои ихтиёрии донишҷӯён ва омӯзгорон байни сохторҳои маҳаллӣ, муассисаҳо, кӯчаҳо ва роҳравҳои марказии ноҳияи Данғара ҳаракат намуда, бо шаҳрвандон мулоқот оростанд. Онҳо моҳияти Рӯзи Президент, нақши Пешвои миллат дар таҳкими ваҳдати миллӣ, сулҳу субот ва пешрафти устувори мамлакатро фаҳмониданд.

Иштирокчиёни иқдом бо шиорҳои «Садоқат ба Пешвои миллат – садоқат ба Ватан», «Пешвои миллат – ифтихори ҳар тоҷик» ва «Бо Пешвоем, ки Тоҷикистонамон обод аст» маънавияти баланди ватанпарастиро тарғиб намуданд.

Ин иқдом на танҳо ифодаи эҳтиром ва миннатдории кормандону донишҷӯён ба Пешвои миллат аст, балки нишондиҳандаи садоқат, ваҳдат ва эҳсоси масъулияти шаҳрвандӣ нисбат ба ояндаи дурахшони Тоҷикистон мебошад.

Иқдоми «Садоқат ба Пешвои миллат» бо руҳияи болида ва якдилона анҷом ёфта, бори дигар собит сохт, ки насли ҷавон дар атрофи Пешвои худ муттаҳид буда, барои пешбурди ҷомеаи обод ва муосири тоҷикон кӯшиш менамояд.

АКС: Мақомоти иҷроияи ҳокимияти давлатии ноҳияи Данғара