Вазорати нақлиёти Тоҷикистон: «Новобаста аз боридани барф дар минтақаҳои кӯҳӣ ва ағбаҳо роҳҳои мошингарди ҷумҳурӣ кушода аст»

ДУШАНБЕ, 04.11.2025 /АМИТ «Ховар»/. Новобаста аз боришот дар минтақаҳои кӯҳии ҷумҳурӣ — Суғду Хатлон, Бадахшон ва ноҳияҳои тобеи ҷумҳурӣ тамоми роҳҳои мамлакат кушода буда, ҳаракати воситаҳои нақлиёт дар шоҳроҳҳо ва дигар роҳҳои мошингард мисли рӯзҳои қаблӣ таъмин мебошад. Дар ин хусус ба АМИТ «Ховар» аз Вазорати нақлиёти Тоҷикистон иттилоъ доданд.

Тибқи иттилои манбаъ, баландии барф дар минтақаи Сағирдашт ба 5-6 сантиметр мерасад. Инчунин дар ноҳияҳои Рашт, Файзобод, Варзоб ва дигар минтақаҳои кӯҳии мамлакат боридани барф ба қайд гирифта шудааст.

Дар шоҳроҳи Душанбе — Чаноқ бориши барф идома дошта, баландии он дар баъзе минтақаҳо, аз ҷумла минтақаи наздик ба нақби Истиқлол то 15 сантиметр мерасад. Филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон дар робита ба ҳолати мазкур бетаъхир чораандешӣ намуда, роҳро аз барф тоза ва бо маводи зиддилағзиш коркард намуда истодаанд.

Дар иртибот ба ин Вазорати нақлиёт аз ронандагон хоҳиш менамояд, ки ҳангоми идораи воситаҳои нақлиёт қоидаҳои ҳаракат дар роҳро риоя намоянд.

Ронандагоне, ки дар чунин рӯзҳо ба роҳ мебароянд, бояд ҳолати техникии нақлиёташонро аз назар гузаронанд, чархҳои зимистона насб намоянд, ронандагони мошинҳои боркаши калон ҳатман занҷирҳои зидди яхбандӣ гиранд, инчунин ҳангоми ҳаракат дар роҳҳои кӯҳӣ ва ағбаҳо фосилаи бештар гиранд,тавсияҳои кормандони Бозрасии давлатии автомобилӣ, Вазорати корҳои дохилии Ҷумҳурии Тоҷикистон, Кумитаи ҳолатҳои фавқулода ва мудофиаи гражданиро дар мавриди маҳдуд будани ҳаракати мошинҳо ҳангоми мавҷудияти эҳтимоли тармафароӣ, лағзиши кӯҳпора ва сангфароӣ бечуну чаро риоя намоянд.

Тибқи иттилои Агентии обуҳавошиносии мамлакат, аз 2 то 5 ноябр дар мамлакат ҳавои номусоид боқӣ монда, борон ва дар минтақаҳои кӯҳӣ барф меборад.

АКС аз манбаъҳои боз