35-СОЛАГИИ ИСТИҚЛОЛИ ДАВЛАТӢ. Дар шаҳри Конибодом корҳои созандагӣ вусъати тоза мегиранд

ДУШАНБЕ, 20.12.2025 /АМИТ «Ховар»/. Бахшида ба 35-солагии Истиқлоли давлатии Ҷумҳурии Тоҷикистон дар шаҳри Конибодом корҳои ободонию созандагӣ вусъати тоза гирифтаанд.

Тавре ба АМИТ «Ховар» аз Мақомоти иҷроияи ҳокимияти давлатии шаҳри Конибодом иттилоъ доданд, дар айни замон таъмири пурраи шуъбаи ҷарроҳии калонсолони Беморхонаи марказии шаҳр идома дорад. Баъди анҷоми пурраи корҳои сохтмонӣ ин шуъба бо дастгоҳу таҷҳизоти зарурии муосири тиббӣ таъмин мегардад. Шуъба дорои 25 кат буда, навсозии он ба беҳтар гардидани сатҳи хизматрасонии тиббӣ ба аҳолӣ мусоидат мекунад.

Инчунин то имрӯз бинои чорқабатаи беморхонаи кӯдакона, шуъбаи ҷарроҳии кӯдакона ва шуъбаи таваллуди беморхонаи марказӣ пурра аз таъмир бароварда шуда, ҳоло дар шуъбаҳои осебшиносӣ ва наҷот корҳои таъмиру навсозӣ идома доранд.

Дар шаҳри Конибодом бунёди утоқҳои кории иловагӣ ва толори маҷлиси шуъбаи Вазорати корҳои дохилии Ҷумҳурии Тоҷикистон идома дорад. Лоиҳаи иншоот мутобиқ ба талаботи замони муосир таҳия шуда, дорои 16 ҳуҷраи корӣ ва толори маҷлис барои 100 ҷойи нишаст мебошад.

АКС: Мақомоти иҷроияи ҳокимияти давлатии шаҳри Конибодом