Бо иштироки 2500 нафар кӯдакон дар Душанбе барномаи фарҳангӣ-фароғатӣ баргузор гардид

ДУШАНБЕ, 26.12.2025 /АМИТ «Ховар»/. Бо дастгирии Раиси шаҳри Душанбе муҳтарам Рустами Эмомалӣ имрӯз дар бинои Сирки давлатии Тоҷикистон таҳти унвони «Соли 2026-соли садоқат» барномаи фарҳангӣ-фароғатии кӯдакона доир гардид. Дар ин хусус АМИТ «Ховар» бо истинод ба шуъбаи иттилооти дастгоҳи Раиси шаҳри Душанбе хабар медиҳад.

Дар чорабинӣ 2500 кӯдаки ятим, нимятим, аз оилаҳои ниёзманд ва наврасони фаъоли пойтахт иштирок доштанд.

Бояд таъкид намуд, ки дасти кумак дароз намудан ба ятимону бепарасторон ва оилаҳои ниёзманд аз хислатҳои неки инсонӣ мебошад. Дастгириҳои пайваста ва таваҷҷуҳу ғамхориҳои рӯзафзун нисбат ба ятимону маъюбон, бепарасторон, дардмандону оилаҳои эҳтиёҷманд дар меҳвари сиёсати иҷтимоии давлату Ҳукумати Ҷумҳурии Тоҷикистон қарор дошта, аз амалҳои хайрхоҳона ва инсондӯстонаи Пешвои миллат муҳтарам Эмомалӣ Раҳмон ба ҳисоб меравад.

Дар доираи чунин иқдому тадбирҳои муҳим ва хайрхоҳонаи роҳбарияти давлат ва Ҳукумати Ҷумҳурии Тоҷикистон оилаҳои эҳтиёҷманд, хусусан ятимону шахсони дорои имконияти маҳдуд дар шаҳри Душанбе пайваста дастгирӣ карда шуда, зери таваҷҷуҳу ғамхории ҳамешагии роҳбарияти мақомоти иҷроияи ҳокимияти давлатӣ қарор доранд.

АКС: Шуъбаи иттилооти дастгоҳи Раиси шаҳри Душанбе