Дар деҳаи Деваштичи Панҷакент муассисаи таълимӣ бунёд мегардад

ДУШАНБЕ, 07.12.2025 /АМИТ «Ховар»/. Ба ифтихори ҷашни 35-солагии Истиқлоли давлатии Ҷумҳурии Тоҷикистон дар шаҳри Панҷакент сохтмони иншооти гуногуни иҷтимоӣ идома дорад.

Тавре АМИТ «Ховар» бо истинод ба Мақомоти иҷроияи ҳокимияти давлатии шаҳри Панҷакент хабар медиҳад, дар деҳаи Деваштич Муассисаи таҳсилоти миёнаи умумии рақами 1 сохта мешавад. Бино аз ду ошёна, 13 синфхона, толор ва дигар ҳуҷраҳои ёрирасон иборат буда, барои қабули 480 хонанда дар ду баст пешбинӣ шудааст.

Муассисаи таълимӣ бо сармоягузории Бунёди миллии иҷтимоии маблағгузории Тоҷикистон сохта шуда, ҳоло бинокорони Ҷамъияти дорои масъулияти маҳдуди «Гулгун» ба корҳои пардозгарӣ ва сохтмони утоқҳои ёрирасон машғул ҳастанд.

Инчунин дар деҳаи Шӯрчаҳ бо саҳми сокинон таъмиру таҷдиди собиқ бинои Муассисаи таҳсилоти миёнаи умумии рақами 17 идома дорад. Он баъди таъмиру таҷдид ба кӯдакистон табдил дода мешавад.

АКС: Мақомоти иҷроияи ҳокимияти давлатии шаҳри Панҷакент