Дастаи Тоҷикистон дар Олимпиадаи авруосиёӣ аз фанни технологияи иттилоотӣ соҳиби ҷойи сеюм гардид

ДУШАНБЕ, 17.12.2025 /АМИТ «Ховар»/. 15-16 декабр дар шаҳри Алматои Ҷумҳурии Қазоқистон Олимпиадаи XVII авруосиёӣ  аз фанни технологияи иттилоотӣ баргузор гардид. Дар он аъзои дастаи мунтахаби Ҷумҳурии Тоҷикистон- хонандагони Литсей барои хонандагони болаёқат дар шаҳри Душанбе иштирок намуда, соҳиби ҷойи сеюм гардиданд. Дар ин хусус ба АМИТ «Ховар» аз ин муассиса хабар доданд.

Дар ин сабқати илмию зеҳнӣ 3 хонандаи литсей, аз ҷумла  Муҳаммад Насруллоев, Саъдӣ Ғафуров ва Муҳаммадсамир Убайдов ба гирифтани мақоми сеюм ва медалҳои биринҷӣ ноил гардиданд.

Дар олимпиада 250 даста бо фарогирии 750 хонанда аз Тоҷикистон, Узбекистон, Қирғизистон, Қазоқистон ва Федератсияи Русия иштирок намуд.

Ёдовар мешавем, ки дастоварди навбатии хонандагони муассиса дар Олимпиадаи авруосиёӣ  аз фанни технологияи иттилоотӣ нишони таваҷҷуҳи пайваста, фароҳам овардани имконияти моддию-техникӣ ва дастгирии хонандагони боистеъдоду болаёқат аз ҷониби Ҳукумати Тоҷикистон мебошад.

АКС: Литсей барои хонандагони болаёқат дар шаҳри Душанбе