«Харитаи хатсайри Шӯриши Восеъ» таҳия мегардад

ДУШАНБЕ, 11.12.2025 /АМИТ «Ховар»/. Бо мақсади иҷрои дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон дар ҷараёни сафари корӣ ба ноҳияҳои Ховалинг ва Балҷувони вилояти Хатлон барои  таҳияи «Харитаи хатсайри Шӯриши Восеъ» гурӯҳи корӣ ташкил карда шуд. Дар ин хусус ба АМИТ «Ховар» аз Агентии ҳифзи мероси таърихию фарҳангии назди Ҳукумати Ҷумҳурии Тоҷикистон хабар доданд.

Гурӯҳи корӣ аз ҳисоби кормандони Агентии ҳифзи мероси таърихию фарҳангӣ бо ҷалби олимони соҳавӣ ташкил гардидааст, ки корро дар ин самт ба роҳ мемонанд.

Омоданамоии «Харитаи хатсайри Шӯриши Восеъ» ба шиносоӣ бо ҳаёт ва зиндагии мардуми ноҳияҳои Ховалингу Балҷувон, баланд бардоштани ҳисси ватандӯстӣ ва эҳтиром ба миллат ва фарҳангу тамаддуни он, шиносоӣ бо дастовардҳои замони истиқлолият дар ин ноҳияҳо, инчунин боз ҳам устувор гардидани ваҳдати миллӣ, ҷалби бештари сайёҳони дохилию хориҷӣ ба диёри зебоманзари Ховалингу Балҷувон мусоидат менамояд.

Харита аз оғоз то анҷоми шӯришро фаро гирифта, доир ба деҳаҳою мавзеъҳои таърихӣ маълумоти мушаххас медиҳад.

АКС: Агентии ҳифзи мероси таърихию фарҳангии назди Ҳукумати Ҷумҳурии Тоҷикистон