Сокинони ноҳияи Шаҳритус соҳиби туҳфаи Пешвои миллат- «Шоҳнома»-и безавол мегарданд

ДУШАНБЕ, 29.12.2025 /АМИТ «Ховар»/. Дар доираи иқдоми фарҳангии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар ноҳияи Шаҳритус тақсими шоҳасари безаволи Абулқосим Фирдавсӣ — «Шоҳнома» оғоз гардид, хабар медиҳад АМИТ «Ховар».

Ин туҳфаи арзишманди Пешвои миллат  ба 21 ҳазору 549 оила дар 5 ҷамоати деҳот ва 1 ҷамоати шаҳраки ноҳия тақсим карда мешавад.

Иқдоми навбатии  Сарвари давлат оид ба интишор ва ба ҳар хонаводаи тоҷик тақдим кардани «Шоҳнома»-и безаволи Ҳаким Фирдавсӣ идомаи ташаббусҳои дурбинонаю ватандӯстонае мебошад, ки на танҳо ба баланд бардоштани  эҳсоси ватандӯстии мардум, балки ба боло бурдани сатҳи маънавӣ ва ҷаҳонбинию дунёшиносии сокинони мамлакат нигаронида шудааст.

Соли 2026 дар мамлакат Озмуни ҷумҳуриявии «Шоҳномахонӣ» доир карда мешавад.

Ин озмун ба ҷашни 35-солагии Истиқлоли давлатӣ бахшида шуда, мақсади он аз таҳкими ҳувияти миллӣ, арҷгузорӣ ба таърихи пурифтихори миллати тоҷик, эҳёи ҳофизаи таърихӣ ва омӯзиши ҳамаҷонибаи осори адабии ниёгон иборат аст.

Сарпарасти озмун Президенти Ҷумҳурии Тоҷикистон муҳтарам Эмомалӣ Раҳмон буда, барои мукофотонидани ғолибон аз Фонди захиравии Президент 2 миллиону 660 ҳазор сомонӣ пешбинӣ карда шудааст.

АКС: АМИТ «Ховар»