ЭНЕРГИЯИ «САБЗ». Дар Тоҷикистон аз ҷониби ширкати саудии «Аcwa Power» неругоҳҳои офтобӣ сохта мешаванд

ДУШАНБЕ, 15.01.2026 /АМИТ «Ховар»/. Дар шаҳри Абузабӣ масъалаҳои густариши ҳамкории дуҷонибаи Тоҷикистон ва Амороти Муттаҳидаи Араб дар соҳаи энергетика, бахусус бунёди неругоҳҳои офтобӣ бо иқтидори умумии 1250 МВт дар Тоҷикистон баррасӣ гардиданд. Дар ин хусус АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон иттилоъ медиҳад.

Зимни мулоқоти муовини Вазири энергетика ва захираҳои оби Ҷумҳурии Тоҷикистон Манучеҳр Сафарзода ва Президенти ширкати «Acwa Power» дар Осиёи Марказӣ Абид Малик таваҷҷуҳи махсус ба татбиқи лоиҳаи хати интиқоли барқи баландшиддати 500 кВ «Роғун-Сайҳун» ва аз мавзеи Сайҳун то зеристгоҳи барқии «Суғд-500» зоҳир гардид. Ин лоиҳа барои таҳкими устувории низоми энергетикии мамлакат ва афзоиши иқтидори интиқоли барқ аҳамияти калидӣ дорад.

Ҷонибҳо барои идомаи музокирот, таҳияи ҷузъиёти техникию иқтисодии лоиҳаҳо ва ҷалби сармоягузорӣ дар самти рушди энергетикаи «сабз» изҳори омодагӣ намуданд. Мулоқот дар ҳошияи чорабинии Ҳафтаи рушди устувори Абузабӣ – 2026, ки то 15 январ дар Амороти Муттаҳидаи Араб идома меёбад, баргузор гардид.

АКС: Вазорати энергетика ва захираҳои оби Ҷумҳурии Тоҷикистон