Дар канори шоҳроҳи мошингарди Данғара–Душанбе беш аз 4000 бех ниҳол шинонида шуд

ДУШАНБЕ, 14.02.2026 /АМИТ «Ховар»/. Дар доираи  татбиқи «Барномаи давлатии кабудизоркунии Ҷумҳурии Тоҷикистон то давраи соли 2040» аз ҷониби Сарраёсати ҳифзи муҳити зисти вилояти  Хатлон  ва гурӯҳи мутахассисону фаъолон дар канори шоҳроҳи мошингарди Данғара–Душанбе  беш аз 4000 бех ниҳоли дарахтони ҳамешасабзу сояафкан  шинонида шуд. Дар ин  хусус АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон иттилоъ медиҳад. 

Раиси вилояти Хатлон Давлаталӣ Саид ва Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода зимни ниҳолшинонӣ ва суҳбат бо сокинон оид ба  аҳаммияти иқдоми мазкур дар беҳтарсозии муҳити зист, зебоии маҳал ва афзоиши масоҳати сабзазор сухан гуфтанд. Таъкид карда шуд, ки раванди нигоҳубини ниҳолҳои шинонида таҳти назорати ҷиддӣ қарор дода шавад, то нашъунамои босифати онҳо таъмин гардад.

Тибқи нақшаи «Барномаи давлатии кабудизоркунии Ҷумҳурии Тоҷикистон  барои давраи то соли 2040» дар вилояти Хатлон соли  2026 шинонидани 600 ҳазор бех дарахтони ороишӣ, сояафкан, ҳамешасабз ва мевадиҳанда ва  9 миллиону 95 ҳазору  140 дона гулу буттаҳо пешбинӣ гардидааст.

Ниҳолшинонӣ аз ҷумлаи амалҳои неку созанда буда, ҳамчун анъанаи нек аз гузаштагон ба мо мерос мондааст. Аз ин рӯ, дар вилояти Хатлон маъракаи ниҳолшинонӣ ҳамасола ба иди сарсабзу хуррамгардонӣ табдил ёфта, сокинон дар сабзгардонии талу теппаҳо фаъолона саҳм мегузоранд. Дар тамоми шаҳру ноҳияҳои вилоят бунёдкорӣ, ниҳолшинонӣ ва сабзазоркунӣ вусъат ёфта, барои ободу зебо гардонидани ҳар деҳа, маҳалла ва ҷамоатҳои шаҳраку деҳот тадбирҳои муассир амалӣ гардонида мешаванд.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон