Дар минтақаи Ховарон дар беш аз 7 гектар боғи мевадиҳанда бунёд мегардад

ДУШАНБЕ, 26.02.2026 /АМИТ «Ховар»/. Дар минтақаи Ховарони шаҳри Душанбе дар беш аз 7 гектар боғи себу олу ва ангур бо ду ҳавзи захираи об бунёд мегардад, хабар медиҳад АМИТ «Ховар».

Боғ аз ҷониби Кумитаи давлатии идораи замин ва геодезии Ҷумҳурии Тоҷикистон бунёд карда мешавад. 25 феврал дар ин минтақа бо иштироки Раиси Кумитаи давлатии идораи замин ва геодезӣ ва роҳбарони корхонаву муассисаҳои сохтории Кумитаи давлатӣ машварат доир гардид.

Раиси Кумитаи давлатии идораи замин ва геодезӣ Ориф Хоҷазода гуфт, ки ҳадафи машварат дуруст ва бо риояи қатъии агротехникӣ шинонидани ниҳолҳо, бунёди боғи сабзу хуррам ва таъмини нашъунамои он буда, ба ин васила дар ободу зебо ва сабзу хуррамгардонии шаҳри Душанбе саҳм гузошта мешавад.

Аз ҷониби директори Институти давлатии лоиҳакашии заминсозии «Тоҷикзаминсоз» тарзи кишту парвариши ниҳолҳо дар ин минтақа ба таври муфассал шарҳу тавзеҳ дода шуд.

Иброз гардид, ки мутахассисони институт аз ин замин намунаҳо гирифта, таркиби муқаддамотии онро муайян намудаанд. Ташхиси хокшиносӣ марҳилаи муҳими оғози киштукор буда, ба ин масъала бояд таваҷҷуҳи махсус зоҳир карда шавад.

Бояд гуфт, ки дар Тоҷикистон «Барномаи давлатии кабудизоркунии Ҷумҳурии Тоҷикистон барои давраи то соли 2040» мавриди амал қарор дорад. Яке аз ҳадафҳои асосии барнома- ин  нигоҳдории вазъи муътадили ҳавои атмосфера ва тавозуни табиии устувор, инчунин танзими асосҳои экологӣ, иқтисодӣ ва идоракунии самарабахши сабзазоркунӣ ва васеъ намудани майдони он мебошад.

Дар барнома ҳамчунин риояи талаботи агротехникии ниҳолшинонӣ ҳангоми пешбурди корҳои сабзазоркунӣ, таъмини сабзиши ниҳолҳо ва баланд бардоштани донишу таҷрибаи мутахассисон дар самти хуррамгардонӣ махсус иброз шудааст.

АКС: Кумитаи давлатии идораи замин ва геодезии Ҷумҳурии Тоҷикистон