Дар муассисаҳои таълимии ноҳияи Данғара даври аввали (муассисавии) Озмуни ҷумҳуриявии «Фурӯғи субҳи доноӣ китоб аст» оғоз шуд

ДАНҒАРА, 05.02.2026. /АМИТ «Ховар»/. Дар муассисаҳои таълимии ноҳияи Данғара даври аввали (муассисавии) Озмуни ҷумҳуриявии «Фурӯғи субҳи доноӣ китоб аст» идома дорад. Дар ин хусус ба АМИТ «Ховар» аз Мақомоти иҷроияи ҳокимияти давлатии ноҳияи Данғара иттилоъ доданд.

Озмун бо мақсади татбиқи сиёсати фарҳангпарваронаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, баланд бардоштани сатҳи маърифати китобдӯстӣ, рушди тафаккури зеҳнӣ ва ҷалби хонандагон ба мутолиаи осори адабӣ гузаронида мешавад.

Дар даври муассисавии озмун хонандагони муассисаҳои таҳсилоти умумии ноҳия аз рӯи номинатсияҳои муайяншуда иштирок намуда, маҳораташонро дар қироати шеър, мутолиаи асарҳои бадеӣ ва донистани забону адабиёти тоҷик ба намоиш мегузоранд.

Ғолибони даври муассисавӣ ба даври навбатии озмун роҳхат гирифта, дар озмуни сатҳи ноҳиявӣ иштирок мекунанд.

Иброз гардид, ки баргузории Озмуни ҷумҳуриявии «Фурӯғи субҳи доноӣ китоб аст» дар муассисаҳои таълимии ноҳияи Данғара ба таҳкими маърифати китобхонӣ, рушди қобилияти эҷодӣ ва болоравии сатҳи донишандӯзии хонандагон мусоидат менамояд.

АКС: Мақомоти иҷроияи ҳокимияти давлатии ноҳияи Данғара