НИШАСТИ МАТБУОТӢ. Соли 2025 ба соҳаҳои иқтисодии Тоҷикистон 57,1 миллиард сомонӣ равона карда шуд

ДУШАНБЕ, 14.02.2026 /АМИТ «Ховар»/. Соли 2025 иҷрои нақшаи қисми даромади буҷети давлатӣ дар сатҳи 113,2 фоиз таъмин карда шуда, ба буҷет зиёда аз 60,3 миллиард сомонӣ ворид гардид. Дар ин хусус 13 феврал зимни нишасти матбуотӣ Вазири молияи Ҷумҳурии Тоҷикистон Файзиддин Қаҳҳорзода маълумот дод.

Ба иттилои Файзиддин Қаҳҳорзода, соли 2025 хароҷоти буҷети давлатӣ дар доираи нақшаи пешбинигардида ва даромадҳои воқеии буҷет амалӣ карда шуда, ба соҳаҳои иқтисодии ҷумҳурӣ 57,1 миллиард сомонӣ равона гардид. Аз ҷумла, ба соҳаҳои маориф 11,3 миллиард сомонӣ, комплекси сӯзишворию энергетикӣ- 10,9 миллиард сомонӣ, ҳифзи иҷтимоӣ- 7,1 миллиард сомонӣ, тандурустӣ- 4,3 миллиард сомонӣ, мақомоти ҳокимият ва идоракунии давлатӣ- 3,3 миллиард сомонӣ, нақлиёт- 2,7 миллиард сомонӣ, фарҳангу варзиш- 2,5 миллиард сомонӣ, хоҷагии манзилию коммуналӣ- 2,5 миллиард сомонӣ, кишоварзӣ- 1,3 миллиард сомонӣ, саноат ва сохтмон- 386,1 миллион сомонӣ равона карда шуд.

Аз ҳаҷми умумии ин маблағгузорӣ ба соҳаҳои иҷтимоӣ 25,3 миллиард сомонӣ, соҳаҳои воқеии иқтисодиёт 17,9 миллиард сомонӣ ва ба дигар соҳаҳо 13,9 миллиард сомонӣ рост меояд.

Инчунин иброз гардид, ки барои таъмини фаъолияти сиёсати берунаи ҷумҳурӣ 382,2 миллион сомонӣ, аз ҷумла барои нигоҳдории намояндагиҳои дипломатӣ дар хориҷи мамлакат 291,9 миллион сомонӣ ва барои ҳаққи узвияти ҷумҳурӣ дар созмонҳои байналмилалӣ ва байнидавлатӣ 90,3 миллион сомонӣ пардохт гардид.

Раъно НУСРАТУЛЛО,
АМИТ «Ховар»

АКС: АМИТ «Ховар»