Раёсати Вазорати корҳои дохилӣ дар вилояти Хатлон: «Бар зидди паҳншавии воситаҳои нашъадор якҷоя мубориза барем!»

ДУШАНБЕ, 10.02.2026 /АМИТ «Ховар»/. Раёсати Вазорати корҳои дохилӣ дар вилояти Хатлон дар муроҷиатномааш тамоми сокинони вилояти Хатлонро даъват намудааст, ки дар мубориза бар зидди паҳншавии воситаҳои нашъадор, ҳабҳои сахттаъсири экстазӣ, синтетикӣ ва моддаҳои психотропӣ бетараф набошанд. Дар ин хусус АМИТ «Ховар» бо истинод ба Раёсати Вазорати корҳои дохилии Ҷумҳурии Тоҷикистон дар вилояти Хатлон хабар медиҳад.

Дар муроҷиатнома, аз ҷумла омадааст, ки «имрӯзҳо паҳн гардидани ҳабҳои экстазӣ, синтетикӣ ва дигар воситаҳои мадҳушкунандаи психотропӣ ба хатари ҷиддии ҷомеа табдил ёфтааст. Ин маводи заҳрогин, пеш аз ҳама, ҷавонон ва наврасонро ҳадаф қарор дода, орзуҳо, саломатӣ ва ояндаи онҳоро нобуд месозад. Ин зуҳуроти номатлуб на танҳо сарнавишти як нафар, балки амнияти оила ва ҷомеаро зери хатар мегузорад».

Мақомоти милитсия таъкид менамояд, ки мубориза бо ҷиноятҳои вобаста ба маводи мухаддир танҳо бо талоши мақомоти ҳифзи ҳуқуқ имконпазир набуда, иштироки фаъоли ҳар шаҳрвандро талаб менамояд. Бетарафӣ нисбат ба чунин ҷиноятҳо метавонад боиси оқибатҳои вазнини иҷтимоӣ гардад.

Дар муроҷиатнома ҳамзамон омадааст, ки мутаассифона, дар баъзе ҳолатҳо хомӯшӣ ва бетарафии атрофиён боис мегардад, ки ин амали хатарнок реша давонад. Бо ин мақсад Раёсати Вазорати корҳои дохилӣ дар вилояти Хатлон таъкид менамояд, ки бетарафӣ ҷиноят аст, зеро ҳар наврасу ҷавоне, ки имрӯз ба роҳи нашъамандӣ меравад, метавонад фарзанди мо, ҳамсояи мо ё ояндаи аздастрафтаи ҷомеа бошад.

Милитсияи Хатлон махсусан ба падару модарон, омӯзгорон, калонсолон ва аҳли ҷомеа муроҷиат намудааст, ки нисбат ба тақдири ояндаи фарзандон бетараф набошанд.

Бо назардошт ва муҳимияти ҳифзи солимии ҷомеа ва хонаводаҳо Раёсати Вазорати корҳои дохилӣ дар вилояти Хатлон ҳама шаҳрвандонро даъват намудааст, ки:

-дар ҳолати дастрас гардидани маълумот оид ба нигоҳдорӣ, истифода ё паҳншавии воситаҳои нашъадор, ҳабҳои экстазӣ, синтетикӣ ва моддаҳои психотропӣ, ҳамчунин доир ба фаъолияти ғайриқонунии паҳнкунандагони он фавран ба мақомоти милитсия хабар диҳанд;

— дар зеҳну тафаккури ҷавонон ҳисси масъулиятшиносӣ, худогоҳӣ ва нафрат нисбат ба маводи мухаддирро ташаккул диҳанд;

— нисбат ба ҳар далели шубҳанок хомӯш ва бетараф набошанд.

Раёсати Вазорати корҳои дохилӣ дар вилояти Хатлон кафолат медиҳад, ки ҳар муроҷиат ба таври ҷиддӣ баррасӣ гардида, махфияти шахсияти мусоидаткунанда пурра таъмин карда мешавад.

АКС: Раёсати Вазорати корҳои дохилии Ҷумҳурии Тоҷикистон дар вилояти Хатлон