Соли 2025 ба Тоҷикистон беш аз 1 миллион тонна гандум ворид карда шуд

ДУШАНБЕ, 08.02.2026 /АМИТ «Ховар»/. Соли 2025 ба Тоҷикистон аз ҷониби 78 субъекти хоҷагидор 1 миллиону 278 ҳазору 400 тонна гандум ба маблағи 300 миллиону 953 ҳазор доллар бо нархи миёнаи 235 доллар барои 1 тонна ворид гардидааст. Воридоти гандум нисбат ба ҳамин давраи соли 2024 220,6 ҳазор тонна ба маблағи 26,4 миллион доллар афзоиш ёфтааст. Дар ин хусус 6 феврал зимни нишасти матбуотӣ сардори Хадамоти зиддиинҳисории назди Ҳукумати Ҷумҳурии Тоҷикистон Ҳайдаралӣ Раҷабзода ба хабарнигорон иттилоъ дод.

Иброз гардид, ки соли 2025 дар ҷумҳурӣ 811,3 ҳазор тонна гандум истеҳсол гардидааст, ки нисбат ба ҳамин давраи соли 2024 69,4 ҳазор тонна ё 7,9 фоиз коҳиш ёфтааст.

Иттилоъ дода шуд, ки дар ин давра ба ҷумҳурӣ 51,9 ҳазор тонна орд ба маблағи 16,2 миллион доллар аз ҷониби ҷамъиятҳои дорои масъулияти маҳдуди «Дурахши Осиё», «Сахад», «Таҷ Тур» ва дигар субъектони хоҷагидор ворид карда шуд. Дар баробари ин, соли 2025 дар ҷумҳурӣ ба миқдори 693,8 ҳазор тонна орд истеҳсол карда шуд, ки ҳаҷми истеҳсоли он нисбат ба ҳамин давраи соли 2024 23,6 ҳазор тонна ё 3,5 фоиз афзоиш ёфтааст.

Раъно НУСРАТУЛЛО,
АМИТ «Ховар»

АКС: АМИТ «Ховар»