Ҳамкории Тоҷикистон бо сохтори СММ оид ба масоили коҳиши офатҳои табиӣ баррасӣ гардид

ДУШАНБЕ, 20.03.2026 /АМИТ «Ховар»/. Сафири Фавқулода ва Мухтори Ҷумҳурии Тоҷикистон дар Конфедератсияи Швейтсария, Намояндаи доимии Ҷумҳурии Тоҷикистон дар назди Шуъбаи Созмони Милали Муттаҳид ва дигар ташкилоти байналмилалӣ дар Женева Шараф Шерализода бо намояндаи махсуси Дабири кулли Созмони Милали Муттаҳид оид ба масъалаҳои коҳиши офатҳои табиӣ, Роҳбари идораи Созмони Милали Муттаҳид оид ба коҳиш додани хатари офатҳои табиӣ (UNDRR) Камал Кишоре мулоқот намуд.

Тавре ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд, зимни мулоқот ҷонибҳо атрофи масъалаҳои тақвияти ҳамкории Тоҷикистон бо сохторҳои дахлдори Созмони Милали Муттаҳид ва дурнамои иқдоми муштарак дар самти коҳиши хатари офатҳои табиӣ мубодилаи афкор намуданд.

Ҳамзамон ба Камал Кишоре даъватнома ба Конфронси чоруми байналмилалии сатҳи баланд барои татбиқи Даҳсолаи байналмилалии амал «Об барои рушди устувор», солҳои 2018-2028, ки аз 25 то 28 майи соли 2026 дар шаҳри Душанбе баргузор мегардад,  супорида шуд.

АКС: Вазорати корҳои хориҷии Ҷумҳурии Тоҷикистон