Дар Донишкадаи кӯҳию металлургии Тоҷикистон бахшида ба Рӯзи Модар ҳамоиш доир гардид

ДУШАНБЕ, 04.03.2026 /АМИТ «Ховар»/. 3 март дар Донишкадаи кӯҳию металлургии Тоҷикистон бахшида ба Рӯзи Модар таҳти унвони «Зан-сарвар — намунаи ибрат ва роҳнамои насли ҷавон» машварати илмӣ-амалӣ баргузор шуд, хабар доданд ба АМИТ «Ховар» аз донишкада.

Дар ҷамъомад ректори донишкада Бахтиёр Маҳмадалӣ изҳор дошт, ки дар Тоҷикистон ҳамасола Рӯзи Модар бо тантанаву шукуҳи хосса таҷлил карда мешавад ва ин аз мақому мартабаи баланди занону модарон шаҳодат медиҳад. Занони баору номуси тоҷик ҳамеша дар тарбияи насли меҳандӯсту хештаншинос саҳми арзанда мегузоранд. Президенти Ҷумҳурии Тоҷикистон муҳтарам Эмомалӣ Раҳмон барои баланд бардоштани мақоми зан дар ҷомеа пайваста талош менамоянд ва дар ин маврид чунин ибрози назар намудаанд: «Ҷомеае, ки ба зан- модар ғамхорӣ менамояд, ба ояндаи худаш ғамхорӣ мекунад. Давлате, ки нисбат ба модар- ин сарчашмаи ҳаёт ва бақои насли инсон бепарво бошад, ояндаи худро аз даст медиҳад».

Дар ҳақиқат занони баору номуси миллат борҳо исбот кардаанд, ки метавонанд дар баробари мардон барои ҳифзи марзу бум ва арзишҳои миллӣ ҷоннисорӣ намоянд.

Бахтиёр Маҳмадалӣ аз нақши занони омӯзгор ва саҳмгузор дар соҳаи маориф ёдовар шуда, иброз дошт, ки занони Донишкадаи кӯҳию металлургӣ дар тарбияи мутахассисони варзидаи соҳаи саноат  саҳми арзанда доранд ва ҷомеа ин хизматҳоро ҳаргиз фаромӯш намесозад.

Дар чорабинӣ занони собиқадор дар мавзуъҳои «Саҳми модарон ва бонувони тоҷик дар пешрафти Тоҷикистони соҳибистиқлол», «Модар-сулҳофар», «Зан-модар- чароғи хонадон, пояи давлат ва офарандаи ҳаёт», «Саҳми занон дар рушди илму маориф» ва ғайра  маъруза намуданд.

Барномаи рангини фарҳангӣ аз ҷониби ансамбли ҳунарии «Ҷилои ёқут» пешкаши ҳозирин гардид.

АКС: Донишкадаи кӯҳию металлургии Тоҷикистон