ҶОМИ ОСИЁ-2027. Ҳайати дастаи мунтахаби Тоҷикистон барои бозии ниҳоӣ бо дастаи яккачини Филиппин муайян шуд

ДУШАНБЕ, 18.03.2026 /АМИТ «Ховар»/. Ситоди мураббиёни дастаи мунтахаби Тоҷикистон оид ба футбол таҳти роҳбарии Горан Стеванович ҳайати дастаро барои бозии ниҳоии марҳилаи интихобии Ҷоми Осиё-2027 бо тими миллии Филиппин, ки 31 март дар шаҳри Ҳисор баргузор мешавад, эълон кард.

Тавре ба АМИТ «Ховар» аз Федератсияи футболи Тоҷикистон хабар доданд, бисту панҷ бозигар — 3 дарвозабон, 10 ҳимоятгар, 8 нимҳимоятгар ва 4 ҳамлагар барои омодагӣ ба вохӯрии дарпешистода ба дастаи мунтахаби миллӣ даъват шуданд. Рӯйхати ниҳоӣ барои бозӣ 23 бозигарро дар бар мегирад.

Ҳимоятгар Ваҳдат Ҳанонов («Сипоҳон») ва нимҳимоятгар Амадонӣ Камолов («Гул Гуҳар») бо сабаби ҷароҳат доштан дар ин бозӣ иштирок намекунанд.

Ҷамъомади тамринии дастаи мунтахаби миллӣ 23 март дар шаҳри Душанбе оғоз мешавад.

Бозии шашуми даври интихобии Ҷоми Осиё-2027 дар гурӯҳи «А» байни Тоҷикистон ва Филиппин 31 март,  соати 19:00 дар варзишгоҳи марказии Ҳисор баргузор мегардад.

АКС: Федератсияи футболи Тоҷикистон