Ҷониби Тоҷикистон аз баргузории муваффақонаи раъйпурсии ҷумҳуриявӣ дар Қазоқистон истиқбол намуд

ДУШАНБЕ, 17.03.2026. /АМИТ «Ховар»/. Ҷумҳурии Тоҷикистон ба мардуми дӯсти Ҷумҳурии Қазоқистон ба муносибати баргузории муваффақонаи раъйпурсии ҷумҳуриявӣ табрикоти самимона изҳор менамояд. Дар ин хусус ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд.

Дар табрикот омадааст, ки «иштироки фаъоли интихобкунандагон ва натиҷаҳои раъйдиҳӣ далели возеҳи дастгирии васеи ҷомеа аз сиёсати пешгирифтаи роҳбарияти мамлакат ва эътимоди мардум ба барномаи ислоҳоти густурда мебошад.

Мо итминони комил дорем, ки натиҷаҳои раъйпурсӣ барои рушду шукуфоии мунтазами Ҷумҳурии Қазоқистон заминаи мустаҳкам хоҳанд гашт.

Тоҷикистон пойбандии устуворро ба руҳияи дӯстии ҷовидона, ҳампаймонӣ ва шарикии стратегӣ бо Қазоқистон тасдиқ мекунад.

Зимнан, ба мардуми бародари Қазоқистон таманнои сулҳу субот, некӯаҳволӣ ва комёбиҳои нав дар роҳи бунёди давлати боиқтидору соҳибихтиёр иброз мегардад».

АКС: Вазорати корҳои хориҷии Ҷумҳурии Тоҷикистон