«ҲАМКОРӢ–2026». Дар Хатлон машқҳои муштараки стратегӣ гузаронида шуданд

ДУШАНБЕ, 15.04.2026. /АМИТ «Ховар»/. Аз 6 то 10 апрел дар машқгоҳи «Ҳарбмайдон»-и гарнизони вилояти Хатлон машқҳои муштараки амалиётӣ-стратегии «Ҳамкорӣ–2026» бо иштироки қӯшунҳо ва ҷузъу томи сохторҳои қудратии ин минтақа баргузор гардиданд. Дар ин хусус ба АМИТ «Ховар» аз Вазорати мудофиаи Ҷумҳурии Тоҷикистон хабар доданд.

Иттилоъ дода шуд, ки машқҳо дар асоси барномаи бурдани амалиёти махсус барои безараргардонии гурӯҳҳои ғайриқонунии силоҳбадаст ҳангоми убури сарҳади давлатӣ бо истифода аз техникаю таҷҳизоти муосири ҳарбӣ, аз ҷумла дастгоҳҳои парвозкунандаи бесарнишин, воситаҳои муҳорибаи радиоэлектронӣ ва мудофиаи зиддиҳавоӣ дар шароити кӯҳсор гузаронида шуданд. Даври ниҳоии машқҳо бо баргузории тамринҳои баталионӣ-тактикӣ ва тирпаронии ҷангӣ анҷом ёфт.

Дар ҷамъомади тантанавӣ, ки ба муносибати анҷоми муваффақонаи машқҳои навбатӣ доир гардид, Вазири мудофиаи Ҷумҳурии Тоҷикистон Эмомалӣ Собизода иброз дошт, ки мустаҳкам намудани иқтидори мудофиавии давлат ва баланд бардоштани сатҳи омодабошии ҷангии Қувваҳои Мусаллаҳ таҳти таваҷҷуҳи доимии Президенти Ҷумҳурии Тоҷикистон муҳтарам Эмомалӣ Раҳмон қарор дорад. Аз рӯзҳои аввали таъсиси Артиши миллӣ хизматчиёни ҳарбӣ ғамхорию дастгирии Сарвари давлатро пайваста эҳсос менамоянд.

Таъкид гардид, ки бо назардошти вазъи мураккаби ҷаҳон ва таҳдиду хатарҳои мавҷуда Вазорати мудофиа дар ҳамкорӣ бо дигар сохторҳои қудратии мамлакат барои таъмини амнияти миллӣ, ҳифзи арзишҳои Истиқлолияти давлатӣ ва ҳимояи якпорчагии давлат тадбирҳои зарурӣ меандешад.

Дар анҷом барои иштироки фаъолона дар машқҳои муштараки ҳарбӣ як зумра иштирокчиён бо Сипоснома, медалҳои ҷашнӣ ва туҳфаҳои хотиравӣ қадрдонӣ карда шуданд.

АКС: Вазорати мудофиаи Ҷумҳурии Тоҷикистон