АНОРПАРВАРӢ. Дар Тоҷикистон 2026 гектар боғи мевадиҳандаи анор мавҷуд аст

ДУШАНБЕ, 22.04.2026. /АМИТ «Ховар»/. Дар ҳама бахшҳои хоҷагидорӣ дар Тоҷикистон 2496 гектар боғи анор мавҷуд аст, ки аз он 2026 гектараш мевадиҳанда мебошад.

Тавре дар суҳбат ба АМИТ «Ховар» доктори илмҳои кишоварзӣ Ҳикматулло Назиров иброз намуд, анорпарварӣ яке аз самтҳои муҳими кишоварзии мамлакат ба шумор меравад. Он барои рушди содирот ва таъмини амнияти озуқавории мамлакат аҳамияти калон дорад. Дар бештари минтақаҳои мамлакати мо дарахти анор парвариш меёбад. Аммо меваи анори минтақаи Норак аз ҷиҳати таъм ва сифат аз дигар минтақаҳо фарқ мекунад.

«Дар бештари минтақаҳои мамлакат дар фасли зимистон аз ҳарорати пасти ҳаво дарахтони анорро сард мезанад. Дар минтақаи Норак дарахтони анор аз ҳарорати пасти ҳаво осеб намебинанд. Зеро дар атрофи ин минтақа баҳри Норак буда, аз байни шаҳр дарёи калон мегузарад. Дар вақти ҳаракати об аз он гармӣ хориҷ мешавад, ки ин  барои парвариши анор мусоид мебошад»,-афзуд ҳамсуҳбати мо.

Иброз гардид, ки дар айни замон дар боғҳои анор нармкунии  байни қатор ва бо об таъмин кардани ниҳолҳо идома дорад. Гуфта шуд, ки дар ин минтақа ниҳолҳои анорро,  агар дар қуттиҳои махсус парвариш ёфта бошанд, тамоми фасли сол шинонидан мумкин аст.

Ба иттилои мутахассисони соҳаи тиб, меваи анор аз қанд ва витамини С бой буда, дорои моддаҳои маъданӣ ва микроэлементҳо, ба монанди калтсий, калий, марган ва натрий мебошад. Меваҳо то 60 фоиз шарбат доранд. Шарбати анор барои камхунӣ, қиёми пӯсташ барои сӯхтагӣ ва касалиҳои меъда муфид аст. Меваҳои дорои 0,9 фоиз кислотаи лимӯӣ ширин, аз 0,9 то 1,8 фисад ширин-турш ва зиёда аз 1,8 фоиз турш ҳисобида мешаванд. Навъҳои беҳтарин аз 0,9 фоиз то 1,8 фоиз кислотаи лимӯ ва ҳадди ақалл 12 фоиз қанд доранд.

Аз як дарахти анор 50-60 килограмм ҳосил гирифтан мумкин аст. Дарахти анор аз 3-солагӣ ба ҳосилдиҳӣ оғоз намуда, аз 5 то 35 сол ҳосил медиҳад. Анор ба дарахтони тезҳосилдиҳанда мансуб аст. Меваи онро аз соли дуюми баъди шинонидан чидан мумкин аст.

Давраи ҳосилдиҳии анор аз усули зиёдкунӣ вобаста аст. Агар анор ба воситаи тухм зиёд карда шавад, дар 3-солагӣ ба ҳосилдиҳӣ оғоз мекунад, агар аз қаламча зиёд карда шавад, дар соли дуюми баъди шинонидан ҳосил медиҳад.

АКС: АМИТ «Ховар»