Дабири кулли СААД дар Осорхонаи миллӣ бо таъриху тамаддуни тоҷикон шинос шуд

ДУШАНБЕ, 13.04.2026. /АМИТ «Ховар»/. Дабири кулли Созмони Аҳдномаи амнияти дастҷамъӣ (СААД) Таалатбек Масадиқов дар доираи сафар ба Ҷумҳурии Тоҷикистон дар Осорхонаи миллии Тоҷикистон бо таъриху тамаддуни бостонии тоҷикон шинос шуд, иттилоъ медиҳад АМИТ «Ховар» бо истинод ба ин осорхона.

Зимни сайри осорхонавӣ дабири кулли Созмони Аҳдномаи амнияти дастҷамъӣ Таалатбек Масадиқов харитаи «Ёдгориҳои таърихии Тоҷикистон», толорҳо ва гӯшаҳои намоишии марбут ба «Саразм», «Ҳахоманишиҳо», «Юнону Бохтар», «Тахти Сангин», «Кушониён», «Панҷакенти Қадим», «Дайри буддоии Аҷинатеппа» ва «Сомониён» -ро тамошо намуда, бо бозёфтҳои нодири бостоншиносӣ ва таърихи чандҳазорсолаи миллати тоҷик шинос гардид.

Дар толорҳои намоишии шуъбаи таърихи нав ва навтарин ва толори «Туҳфаҳои Президенти Ҷумҳурии Тоҷикистон» ба меҳмонон дастовардҳои даврони соҳибистиқлолӣ муаррифӣ карда шуданд.

Ҳамин тариқ, дабири кулли Созмони Аҳдномаи амнияти дастҷамъӣ (СААД) Таалатбек Масадиқов аз тамошои толорҳои намоишӣ изҳори хушҳолӣ намуда, таассуроташро дар китоби «Меҳмонони фахрӣ»-и Осорхонаи миллӣ навишт.

АКС: Осорхонаи миллии Тоҷикистон