Дар доираи Даҳаи муаррифии илми академии тоҷик дар Институти фалсафа ва сиёсатшиносӣ ҳамоиши илмӣ доир гардид

ДУШАНБЕ, 07.04.2026. /АМИТ «Ховар»/. Имрӯз дар доираи Даҳаи муаррифии илми академии тоҷик дар Институти фалсафа ва сиёсатшиносии ба номи А.Баҳоваддинови Академияи миллии илмҳои Тоҷикистон бо иштироки васеи олимону муҳаққиқон конференсияи илмию назариявӣ баргузор гардид. Дар ин хусус АМИТ «Ховар» бо истинод ба Академияи миллии илмҳо хабар медиҳад.

Дар конференсия дастовардҳои илмии муҳаққиқон ва масъалаҳои мубрами илми фалсафа, фарҳанг ва сиёсатшиносӣ дар шароити ҷаҳони муосир баррасӣ гардиданд.

Аз ҷониби олимон дар мавзуъҳои «Нақши забони осори бузургон дар ҳувияти миллии тоҷикон», «Худшиносии миллӣ- ҳамчун унсури муҳими ҳувияти миллӣ дар таълимоти Ҷалолиддини Румӣ», «Бозтоби арзишҳои ориёӣ-тоҷикӣ дар тамаддуни исломӣ» ва «Муносибати байниҳамдигарии фалсафа ва дин дар фарҳанги тоҷик» маърузаҳо пешниҳод гардида, забон ҳамчун пояи асосии худшиносии миллӣ арзёбӣ гардид.

Таъкид шуд, ки чунин ҳамоишҳои илмӣ барои густариши тафаккури илмӣ, таҳкими худшиносии миллӣ ва таҳкими робитаи илм бо ҷомеа аҳамияти муҳим доранд.

АКС: Академияи миллии илмҳои Тоҷикистон