«КИШВАРИ САБЗ». Дар Мурғоб беш аз 3 ҳазор бех ниҳоли дарахтони сояафкан шинонида шуд

ДУШАНБЕ, 07.04.2026. /АМИТ «Ховар»/. Дар доираи татбиқи «Барномаи давлатии кабудизоркунии Ҷумҳурии Тоҷикистон барои давраи то соли 2040» дар ноҳияи баландкӯҳи Мурғоб дар 6 гектар беш аз 3 ҳазор бех ниҳоли дарахтони сояафкан шинонида шуда, ҳамзамон дар маркази ноҳия дар 4 гектар боғи нав бунёд гардид, иттилоъ медиҳад АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон.

Ин тадбир дар заминаи дастуру ҳидоятҳои Президенти Ҷумҳурии Тоҷикистон муҳтарам Эмомалӣ Раҳмон ва ба «кишвари сабз» табдил додани Тоҷикистон андешида шуда, ҳадафи он беҳтар намудани вазъи экологии минтақа, сабзгардонии муҳит ва саҳмгузорӣ дар ободонии ҷумҳурӣ мебошад.

Дар ин замина дар доираи татбиқи сиёсати давлатии ҳифзи муҳити зист ва ободонии мамлакат роҳбарияти Кумитаи ҳифзи муҳити зисти назди Ҳукумати Ҷумҳурии Тоҷикистон дар ноҳияи Мурғоб ҳамроҳ бо роҳбарияти Вилояти Мухтори Кӯҳистони Бадахшон дар маъракаи ниҳолшинонӣ иштирок намуд. Ҳайат инчунин бо раванди корҳои ободонию созандагӣ дар ноҳия, хусусан ҷараёни корҳои созандагӣ дар иншооти ҷашнӣ шинос шуд.

Аз ҷумла, дар Ҷамоати деҳоти Аличор бо сохтмони муассисаи томактабӣ, майдончаи варзишӣ ва гармхонаи муосир, ки бо ташаббуси Кумитаи ҳифзи муҳити зист бунёд мегарданд, шинос гардиданд. Гуфта шуд, ки чунин бунёдкорию созандагӣ дар баробари рушди иҷтимоӣ ба баланд бардоштани маърифати экологӣ ва беҳдошти муҳити зист мусоидат менамояд.

Таъкид гардид, ки тақвияти раванди бунёдкорию созандагӣ ба истиқболи ҷашни 35-солагии Истиқлоли давлатии Ҷумҳурии Тоҷикистон инъикосгари таваҷҷуҳи пайвастаи давлату Ҳукумат ба ҳифзи муҳити зист, рушди устувори минтақаҳои дурдаст ва густариши корҳои ободонию сабзгардонӣ буда, дар татбиқи ҳадафҳои стратегӣ нақши муҳим мегузорад.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон