Тоҷикистон ва Иттиҳоди Аврупо ҳамкориро дар соҳаи ҳифзи муҳити зист тақвият мебахшанд

ДУШАНБЕ, 08.04.2026. /АМИТ «Ховар»/. Масъалаҳои ҳифз ва рушди минтақаҳои махсус ҳифзшавандаи табиӣ ва таҳияи масирҳои нави экологӣ барои ҷалби сайёҳон 7 апрел дар вохӯрии Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода бо директори кишварии Иттиҳоди Аврупо дар Тоҷикистон Радослав Дарский баррасӣ гардид.

Баҳодур Шерализода зимни вохӯрӣ дар бораи омода гардидани нашри нави Китоби Сурхи Ҷумҳурии Тоҷикистон иттилоъ дод. Иброз гардид, ки назорати давлатии ҳифзи захираҳои об, мониторинги обҳои партов ва фаъолияти озмоишгоҳи назорати таҳлилӣ аз самтҳои асосии кори кумита ба шумор мераванд.

Директори кишварии Иттиҳоди Аврупо баён намуд, ки табиати Тоҷикистон бо пиряхҳои азим, кӯлҳо, ҷангалҳо ва гуногунрангии олами ҳайвонот беназир мебошад. Иттиҳоди Аврупо ташаббусҳои сабзгардонии қаламрави Тоҷикистонро дастгирӣ менамояд, ки он ба таҳкими устуворӣ ба тағйирёбии иқлим мусоидат мекунад.

Ҳамчунин омодагии ҷониби Иттиҳоди Аврупо барои густариши ҳамкорӣ дар самтҳои мубориза бо ифлосшавии ҳаво, идоракунии партовҳо, аз ҷумла ҷамъоварии ҷудогонаи партовҳо ва тақвияти маърифати экологӣ дар байни аҳолӣ таъкид гардид.

Ҷонибҳо ба мувофиқа расиданд, ки ба хотири беҳтар намудани вазъи муҳити зист дар Тоҷикистон ҳамкориро тақвият мебахшанд.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон