РАВАНДИ ОБИ ДУШАНБЕ. Дар Давлати Кувайт нишасти матбуотӣ оид ба Конфронси чоруми байналмилалии сатҳи баланд доир шуд

ДУШАНБЕ, 07.05.2026. /АМИТ «Ховар»/. Дар Сафорати Ҷумҳурии Тоҷикистон дар Давлати Кувайт бо иштироки роҳбари Барномаи Cозмони Милали Муттаҳид (UN-Habitat) Амира Ал-Ҳассан нишасти матбуотӣ оид ба ҷараёни омодагиҳо ба Конфронси чоруми байналмилалии сатҳи баланд оид ба Даҳсолаи байналмилалии амал «Об барои рушди устувор, 2018–2028», ки аз 25 то 28 майи соли 2026 дар шаҳри Душанбе баргузор мегардад, доир шуд.

Тавре ба АМИТ «Ховар» аз Сафорати Ҷумҳурии Тоҷикистон дар Давлати Кувайт хабар доданд, дар чорабинӣ сафирони кишварҳои гуногун, роҳбарони созмонҳои байналмилалии муқими кишвари иқомат ва намояндагони воситаҳои ахбори омма иштирок намуданд.

Дар нишаст Сафири Фавқулода ва Мухтори Ҷумҳурии Тоҷикистон Зубайдулло Зубайдзода оид ба конфронси мазкур маълумоти мухтасар пешниҳод намуда, иштирокчиёнро бо ташаббусҳои ҷаҳонии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар самти об, бахусус Даҳсолаи байналмилалии амал «Об барои рушди устувор, 2018–2028» шинос карда, ба саволҳои рӯзноманигорон посух дод.

Роҳбари Барномаи Cозмони Милали Муттаҳид (UN-Habitat) дар Давлати Кувайт Амира Ал-Ҳассан оид ба аҳаммияти конфронси об ва ҳадафҳои он ибрози назар намуда, ба ҳамраисии муваффақонаи Ҷумҳурии Тоҷикистон дар раванди омодагӣ ба ин конфронс баҳои баланд дод. Иброз гардид, ки саҳмгузорӣ дар соҳаи об- ин сармоягузорӣ ба ояндаи инсоният ва суботи ҷомеа мебошад.

Ҳамзамон дар ҷараёни нишаст нақши кишварҳои шарик дар татбиқи ҳадафҳои даҳсолаи мазкур махсус таъкид гардид.

АКС: Сафорати Ҷумҳурии Тоҷикистон дар Давлати Кувайт