Таҳти унвони «Меандешам пас ҳастам» намоиши осори Рассоми халқии Тоҷикистон Сӯҳроб Қурбонов оғоз гардид
ДУШАНБЕ, 24.05.2026 /АМИТ «Ховар»/. 22 май дар Осорхонаи миллии Тоҷикистон бахшида ба ҷашни 35-солагии Истиқлоли давлатӣ намоиши инфиродии осори арбоби барҷастаи санъати монументалӣ, Рассоми халқии Тоҷикистон Сӯҳроб Қурбонов таҳти унвони «Меандешам, пас ҳастам» ифтитоҳ гардид. Дар ин хусус ба АМИТ «Ховар» аз Осорхонаи миллии Тоҷикистон иттилоъ доданд.
Намоиш бо ибтикори Осорхонаи миллӣ, Вазорати корҳои хориҷии Ҷумҳурии Тоҷикистон, Комиссияи миллии Ҷумҳурии Тоҷикистон оид ба корҳои ЮНЕСКО ва Вазорати фарҳанги Ҷумҳурии Тоҷикистон созмон дода шуд.
Дар маросими ифтитоҳи намоиш роҳбарияти Вазорати корҳои хориҷӣ, Вазорати фарҳанг, Мақомоти иҷроияи ҳокимияти давлатии шаҳри Душанбе, инчунин ходимони давлатию ҷамъиятӣ ва пайвандони мусаввир иштирок намуданд.
Дар чорабинӣ гуфта шуд, ки Сӯҳроб Қурбонов бо тафаккури густурдаи бадеӣ, рамзшиносии амиқ ва забони пурқуввати образӣ фарқ намуда, дар рушди санъати тасвирии муосири тоҷик саҳми арзишманд гузоштааст.
Таъкид шуд, ки осори рассом таҷассумгари хотираи таърихӣ, маънавият, пайванди фарҳангӣ ва ҷаҳони ботинии инсон буда, дар муаррифии фарҳанги миллӣ дар арсаи байналмилалӣ нақши муҳим дорад.
Ҳамчунин иброз гардид, ки Сӯҳроб Қурбонов ҳамчун Рассоми халқии Тоҷикистон, барандаи чандин ҷоизаҳои давлатӣ ва байналмилалӣ, узви академияҳои бонуфузи санъат ва роҳбари собиқи Иттифоқи рассомони Тоҷикистон дар ташаккули мактаби миллии рассомӣ ва тарбияи насли нави ҳунармандон хизматҳои шоиста намудааст.
Иштирокдорон аз ҳамкории чандинсолаи рассом бо сохторҳои ЮНЕСКО ёдовар шуда, саҳми ӯро дар таҳкими муколамаи байнифарҳангӣ, ҳифз ва тарғиби мероси фарҳангии башарият баланд арзёбӣ намуданд.
Баён гардид, ки баргузории намоишгоҳҳои инфиродии рассом дар қароргоҳи Созмони Милали Муттаҳид /СММ/ дар Ню-Йорк, Дафтари аврупоии СММ дар Женева ва муассисаҳои бонуфузи фарҳангии Чин бозгӯи эътирофи байналмилалии ҳунари ӯ мебошад. Намоиш то 5 июни соли 2026 идома меёбад.
АКС: Осорхонаи миллии Тоҷикистон
Ҳайати Донишкадаи давлатии фарҳанг ва санъати Тоҷикистон дар Фестивали байналмилалии донишҷӯёни ИДМ иштирок намуд
ҲАМДИЛӢ АЗ ҲАМЗАБОНӢ БЕҲТАР АСТ. Эҳдо ба Рӯзи бузургдошти Мавлоно Ҷалолиддини Балхӣ
Дар Осорхонаи миллии Тоҷикистон оид ба дастовардҳои Истиқлоли давлатӣ ҳамоиш доир гардид
Моҳи октябр дар Душанбе Бозиҳои XX Делфии ҷавонони кишварҳои аъзои ИДМ доир мегардад
Дар Душанбе Рӯзҳои кинои Эрон баргузор мегарданд
Дар Рим Намоишгоҳи байналмилалии «Тоҷикистон – кишвари ёдгориҳои нодир» ташкил карда мешавад
Ба ифтихори дохил гардидани Резервати биосферии Ромит ба Шабакаи ҷаҳонии мамнуъгоҳҳои биосферии ЮНЕСКО конфронс доир шуд
Дар Осорхонаи миллии Тоҷикистон маҳфили «Шоҳномахонӣ» баргузор гардид
«ТОҶИ СОМОН». Марҳилаи интихоби беҳтарин филмҳо барои синамоҷоизаи миллӣ оғоз гардид
Котиби генералии Ассамблеяи парламентии Осиё дар Осорхонаи миллӣ бо таъриху тамаддуни тоҷикон шинос шуд
Китоби академик Фарҳод Раҳимӣ «Тамаддуни ориёӣ ва рисолати таърихии миллати тоҷик» нашр шуд
Дар даврони соҳибистиқлолӣ дар вилояти Суғд 152 иншооти фарҳанг бунёд ва таъмиру таҷдид гардидааст
